കോഴിക്കോട്: ഇസ്‌ലാമില്‍ ഏറെ ശ്രേഷ്ഠതയുള്ള ശഅ്ബാന്‍ 15-ാം ദിനത്തോടനുബന്ധിച്ചുള്ള ബറാഅത്ത് രാവ് ഇന്ന്. ഒമാന്‍ അടക്കമുള്ള മുഴുവന്‍ ഗള്‍ഫ് രാഷ്ട്രങ്ങളിലും ഇന്നാണ് ബറാഅത്ത് രാവ്.
ഇതോടനുബന്ധിച്ച് ബറാഅത്ത് ദിനമായ ചൊവ്വാഴ്ച പകലില്‍ കേരളത്തിലെ വിശ്വാസികളോടൊപ്പം ഗള്‍ഫ് നാടുകളിലുള്ള വിശ്വാസികളും പ്രത്യേകമായ ഐഛിക വ്രതം (സുന്നത്ത് നോമ്പ്) അനുഷ്ഠിക്കും.
വിശുദ്ധ റമദാന്‍ മാസത്തിനു മുന്നോടിയായി എത്തുന്ന പവിത്രമായ രാവാണ് ശഅ്ബാന്‍ 15ന്റെ രാവായ ബറാഅത്ത് രാവ്. ഈ രാത്രിയില്‍ ദീര്‍ഘായുസ്സ്, ഭക്ഷണ വിശാലത, പാരത്രിക മോക്ഷം എന്നിവ ലക്ഷ്യമാക്കി വിശുദ്ധ ഖുര്‍ആനിലെ സൂറത്ത് യാസീന്‍ മൂന്നു തവണ പാരായണം ചെയ്യലും വിവിധ ദിക്ര്‍, ദുആകള്‍ അധികരിപ്പിക്കലും വിശ്വാസികള്‍ക്കിടയില്‍ പതിവുള്ളതും ഏറെ പ്രതിഫലാര്‍ഹവുമാണ്.
ബറാഅത്ത് രാവില്‍ ഗള്‍ഫ് രാഷട്രങ്ങളിലെ വിവിധ മത-പ്രവാസി സംഘടനകളുടെ കീഴില്‍ പ്രത്യേകമായ പ്രഭാഷണ പരിപാടികളും പ്രാര്‍ഥനാ സദസ്സുകളും സംഘടിപ്പിക്കുന്നുണ്ട്.