മലപ്പുറം: പൊലിസ് ഫുട്‌ബോളില്‍ ഇന്ന് കടുത്ത പോരാട്ടത്തിനാണ് മലപ്പുറം കോട്ടപ്പടി സ്റ്റേഡിയം സാക്ഷിയാവുക. അതിര്‍ത്തി കാക്കുന്നവരായ ബി.എസ്.എഫും പാരമിലിറ്ററി വിഭാഗമായ സി.ആര്‍.പി.എഫും തമ്മിലാണ് ഇന്നത്തെ മത്സരം. നിലവിലെ ചാംപ്യന്മാരായ ബി.എസ്.എഫ് 25 തവണ പൊലിസ് ഫുട്‌ബോളില്‍ ജേതാക്കളായിട്ടുണ്ട്. ആള്‍ ഇന്ത്യാ പൊലിസ് ഗെയിംസില്‍ മൂന്ന് തവണയും ജേതാക്കളായിട്ടുണ്ട്. മുന്‍ ദേശീയ താരം സൂരജ് ബാന്‍ ഹന്ദയ കരുത്തുറ്റ ടീമിനെയാണ് ഇത്തവണയും കിരീടം പിടിക്കാന്‍ ഒരുക്കിയിട്ടുള്ളത്.

രാമനന്ദ ഹേംബ്രാം,വിശാല്‍, ജിതേന്ദര്‍ റാവത്ത്, ലക്‌വീന്ദര്‍ സിങ്, രജത്കുമാര്‍, ക്യാപ്റ്റന്‍ ബോയ് സിങ്, തല്‍വീന്ദര്‍ സിങ് എന്നിവരാണ് ടീമിലെ കരുത്തരായ സാന്നിധ്യങ്ങള്‍.
അതേസമയം 2006ലും 2009ലും റണ്ണേഴ്‌സായിട്ടുള്ള സി.ആര്‍.പി.എഫ് ബി.എസ്.എഫിനെ പരാജയപ്പെടുത്താന്‍ കെല്‍പുള്ളവരാണ്. മലയാളി താരവും ഗോള്‍കീപ്പറുമായ മോസസ് ആന്റണി, എസ്. ഡി ശ്യാം, എ.അമൂമച്ച,അമര്‍ജീത് സിങ്, രാജേന്ദര്‍ സിങ് എന്നിവരാണ് സി.ആര്‍.പി.എഫ് നിരയിലെ കരുത്തര്‍.2011 ദേശീയ ഗെയിംസിലെ രണ്ടാം സ്ഥാനക്കാരാണ് ഡി.എസ് ഭാട്ടിയ പരിശീലിപ്പിക്കുന്ന സി.ആര്‍.പി.എഫ്.
ലൂസേഴ്‌സ് ഫൈനലില്‍ കേരളം ഇന്ന് രാവിലെ 7.30ന് സി.ഐ.എസ്.എഫിനെ നേരിടും.