കോട്ടക്കല്‍: കോട്ടക്കല്‍ ഇ.എസ്.ഐ ഡിസ്‌പെപെന്‍സറി നവീകരണത്തിന്റെ ഭാഗമായി നിലവില്‍ പ്രവര്‍ത്തിക്കുന്ന വാടകക്കെട്ടിടത്തില്‍നിന്നു മാറ്റാന്‍ കുറച്ച് കൂടി സൗകര്യമുള്ള അനുയോജ്യമായ മറ്റൊരു വാടക കെട്ടിടം കണ്ടെത്തി നല്‍കുന്നതിന് ഇന്‍ഷുറന്‍സ് മെഡിക്കല്‍ സര്‍വ്വീസസ് വകുപ്പ് ഡയറക്ടര്‍ ഇ.എസ്.ഐ കോര്‍പറേഷനോട് അഭ്യര്‍ഥിച്ചിട്ടുണ്ടെന്ന് അഡീഷണല്‍ ചീഫ് സെക്രട്ടറി പ്രൊഫ. ആബിദ് ഹുസൈന്‍ തങ്ങള്‍ എം.എല്‍.എയെ കത്ത് മുഖേന അറിയിച്ചു. ഇ.എസ്.ഐ കോര്‍പറേഷനുമായി ബന്ധപ്പെട്ട് വാടക കെട്ടിടം അടിയന്തിരമായി കണ്ടെത്തി ഡിസ്‌പെന്‍സറി മാറ്റുന്നതിനുള്ള സത്വര നടപടികള്‍ സ്വീകരിക്കുവാന്‍ കത്ത് പ്രകാരം ഇന്‍ഷൂറന്‍സ് മെഡിക്കല്‍ സര്‍വിസസ് വകുപ്പ് ഡയറക്ടര്‍ക്ക് നിര്‍ദ്ദേശം നല്‍കിയിട്ടുണ്ട്.
ഡിസ്‌പെന്‍സറിയില്‍ ഒരു കോണ്‍ട്രാക്ട് ഡോക്ടറെ നിയമിക്കുകയും ഭരണപരമായ കാര്യങ്ങള്‍ നിര്‍വഹിക്കുന്നതിന് സമീപ സ്ഥാപനത്തിലെ ഡോക്ടറെ ആഴ്ചയില്‍ ഒരു ദിവസം സ്‌പെഷ്യല്‍ ഡ്യൂട്ടിക്കായി നിയമിക്കുകയും ഫാര്‍മസിസ്റ്റിന്റെ ഒഴിവ് പി.എസ്.സിക്ക് റിപ്പോര്‍ട്ട് ചെയ്തതായും അഡീ. ചീഫ് സെക്രട്ടറി എം.എല്‍.എയെ അറിയിച്ചു. ഇ.എസ്.ഐ. ഡിസ്‌പെന്‍സറി പുതിയ കെട്ടിടത്തിലേക്ക് മാറ്റി സ്ഥാപിക്കുമെന്ന് കഴിഞ്ഞ ഡിസംബറില്‍ തൊഴിലും എക്‌സൈസും വകുപ്പ് മന്ത്രി ടി.പി രാമകൃഷ്ണനും എം.എല്‍.എയുടെ ചോദ്യത്തിന് നിയമസഭയില്‍ മറുപടി നല്‍കിയിരുന്നു. .ചങ്കുവെട്ടിയിലെ വാടകക്കെട്ടിടത്തില്‍ പ്രവര്‍ത്തിച്ച് കൊണ്ടിരിക്കുന്ന ഇ.എസ്.ഐ ഡിസ്‌പെന്‍സറിയുടെ ശോചനീയാവസ്ഥയും ജീവനക്കാരുടെ കുറവും പരിഗണിക്കണമെന്നാവശ്യപ്പെട്ട് എം.എല്‍.എ നേരത്തെ തൊഴില്‍ വകുപ്പ് മന്ത്രിക്ക് കത്തും നല്‍കിയിരുന്നു.