കൊല്ലം: സംസ്ഥാനത്തെ എല്ലാ സര്‍ക്കാര്‍ ഓഫിസുകളിലും ഹരിതചട്ടം നടപ്പാക്കുന്നതിന്റെ ഭാഗമായി വിവിധ ജില്ലാ ഓഫിസുകളിലെ നോഡല്‍ ഓഫിസര്‍മാര്‍ക്ക് പരിശീലനം ആരംഭിച്ചു.
കില സി.എച്ച്.ആര്‍.ഡി കൊട്ടാരക്കരയില്‍ നടന്ന ദ്വിദിന പരിശീലന പരിപാടിയുടെ ഉദ്ഘാടനം പി. അയിഷാപോറ്റി എം.എല്‍.എ നിര്‍വഹിച്ചു. ഓഫിസുകളിലെ എല്ലാ ചടങ്ങുകളിലും ഹരിതചട്ടങ്ങള്‍ പാലിക്കേണ്ടത് അനിവാര്യമാണെന്ന് എം.എല്‍.എ ഓര്‍മിപ്പിച്ചു. കൃഷിയിടങ്ങള്‍ തരിശായി കിടക്കുന്നത് മാലിന്യക്കൂനകള്‍ സൃഷ്ടിക്കുമെന്നും, തരിശ് സ്ഥലങ്ങളില്‍ ജൈവകൃഷി പ്രോത്സാഹിപ്പിക്കുകയും ജലാശയങ്ങള്‍ സംരക്ഷിക്കുകയും ചെയ്യുന്നതിന് ജീവനക്കാര്‍ മുന്നോട്ട് വരണമെന്നും എം.എല്‍.എ ആവശ്യപ്പെട്ടു.
ജില്ലാതല നോഡല്‍ ഓഫിസര്‍മാരുടെ പരിശീലനത്തിന് ശേഷം താലൂക്ക്‌ബ്ലോക്ക്തല ഓഫിസുകളിലെ നോഡല്‍ ഓഫിസര്‍മാര്‍ക്ക് പരിശീലനം നല്‍കും. ജില്ലാ പഞ്ചായത്ത് പ്രസിഡന്റ് സി. രാധാമണി മുഖ്യപ്രഭാഷണം നടത്തി. വിവിധ വകുപ്പുകളിലെ നോഡല്‍ ഓഫിസര്‍മാര്‍, കെ.എസ്.ഇ.ബി, കെ.എസ്.എഫ്.ഇ, വിവിധ ബോര്‍ഡ്, കോര്‍പറേഷന്‍ എന്നിവയിലെ നോഡല്‍ ഓഫിസര്‍മാര്‍, ജില്ലാ പഞ്ചായത്ത് ആര്‍.പിമാര്‍, ശുചിത്വ മിഷന്‍ ടീം, കില സി.എച്ച്.ആര്‍.ഡി യുടെ സെക്രട്ടറി സി.എസ് ലതിക, ഇ.റ്റി.സി പ്രിന്‍സിപ്പല്‍ ബി. സുധ പങ്കെടുത്തു. ശുചിത്വ മിഷന്‍ ജില്ലാ കോര്‍ഡിനേറ്റര്‍ ജി. സുധാകരന്‍ പരിശീലനത്തിന് നേതൃത്വം നല്‍കി.