ചെറുവത്തൂര്‍: ഗ്രാമീണ മേഖലയുടെ വികസനത്തില്‍ കേരള മാതൃക മനസിലാക്കാന്‍ മിസോറാം സംഘം. മിസോറം സ്റ്റേറ്റ് ലൈവിലി ഹുഡ് മിഷന്‍ അംഗങ്ങളാണ് പിലിക്കോട്, ചെറുവത്തൂര്‍ പഞ്ചായത്തുകളില്‍ എത്തിയിരിക്കുന്നത്. 35 പേരാണ് സംഘത്തിലുള്ളത്. ഗ്രാമീണ വികസനത്തിനായി ഇരു പഞ്ചായത്തുകളും ചെയ്തുവരുന്ന വൈവിധ്യങ്ങളായ പ്രവര്‍ത്തനങ്ങളാണ് മിസോറാം സംഘത്തിനെ ഇവിടെ ആകര്‍ഷിച്ചത്. രണ്ടുസംഘങ്ങളായി തിരിച്ചാണ് മിസോറാം പ്രതിനിധികള്‍ പഞ്ചായത്തുകളില്‍ സന്ദര്‍ശനവും പഠനങ്ങളും നടത്തുന്നത്. ഗ്രാമീണമേഖലയിലെ സര്‍ക്കാര്‍ സ്ഥാപനങ്ങള്‍, വിദ്യാലയങ്ങള്‍, ആശുപത്രികള്‍, മറ്റ് ഘടക സ്ഥാപനങ്ങള്‍ കൃഷിയിടങ്ങള്‍ എന്നിവ സന്ദര്‍ശിക്കുകയും കുടുംബശ്രീ പ്രവര്‍ത്തനം മനസിലാക്കുകയും ആണ് മിസോറം സംഘത്തിന്റെ പ്രധാന ലക്ഷ്യം. ഇതിന്റെ ഭാഗമായി പഞ്ചായത്ത് ബോര്‍ഡ് യോഗങ്ങളില്‍ പങ്കെടുക്കുകയും പഞ്ചായത്ത് പരിധിയിലെ പ്രധാന സ്ഥാപനങ്ങളില്‍ സന്ദര്‍ശനം നടത്തുകയും ചെയ്യുന്നുണ്ട്.
പിലിക്കോട് എത്തിയ സംഘത്തിനുമുന്നില്‍ പഞ്ചായത്ത് പ്രസിഡന്റ് ടി.വി ശ്രീധരന്‍ പഞ്ചായത്ത് ഭരണ സംവിധാനത്തെ കുറിച്ച് ക്ലാസെടുത്തു. വില്ലേജ് കൗണ്‍സില്‍ പ്രതിനിധി, ക്ലസ്റ്റര്‍ കോര്‍ഡിനേറ്റര്‍, വില്ലേജ് ഓഫിസര്‍ എന്നിവരടങ്ങുന്ന മിസോറാം സംഘത്തെ പ്രൊജക്റ്റ് മാനേജര്‍ ജോണ്‍ ലാല്‍ത്ത് ലമൂമ, ലാലുണ്‍സ്വവ എന്നിവരാണ് നയിക്കുന്നത്. ചെറുവത്തൂരില്‍ എത്തിയ സംഘത്തിന് പഞ്ചായത്ത് പ്രസിഡന്റ് മാധവന്‍ മണിയറയുടെ നേതൃത്വത്തില്‍ പഞ്ചായത്ത് അംഗങ്ങളും ഉദ്യോഗസ്ഥരും കുടുംബശ്രീ പ്രവര്‍ത്തകരും ഉള്‍പ്പെടെ നൂറുകണക്കിനാളുകള്‍ ചേര്‍ന്ന് പ്രൗഢഗംഭീരമായ സ്വീകരണം നല്‍കി.
ചെറുവത്തൂരില്‍ എത്തിയ സംഘം സി.ഡി.എസ്, എ.ഡി.എസ്, അയല്‍ക്കൂട്ട യോഗങ്ങള്‍ എന്നിവയില്‍ പങ്കെടുക്കും. കുടുംബശ്രീ യൂനിറ്റുകള്‍, ബാലസഭ ഡാന്‍സ് സ്‌കൂള്‍ , അങ്കണവാടികള്‍ എന്നിവ സന്ദര്‍ശിച്ച് പ്രവര്‍ത്തനം മനസിലാക്കും. മൂന്നുദിവസം ഇരുപഞ്ചായത്തുകളിലും ചെലവഴിക്കുന്ന സംഘം 10ന് തിരിച്ചുപോകും.