മുക്കം: സൗത്ത് കൊടിയത്തൂര്‍ എ.യു.പി സ്‌കൂള്‍ വജ്ര ജൂബിലി ആഘോഷങ്ങളുടെ ഉദ്ഘാടനത്തിനായി എത്തിയ വിദ്യാഭ്യാസ മന്ത്രി സി. രവീന്ദ്രനാഥിനെ സ്വീകരിക്കാനായി വിദ്യാര്‍ഥികളെ റോഡില്‍ ഇറക്കി നിര്‍ത്തിയ സ്‌കൂള്‍ അധികൃതര്‍ക്ക് മന്ത്രിയുടെ ശകാരം. നൂറോളം വിദ്യാര്‍ഥികളെയാണ് മന്ത്രിയെ സ്വീകരിക്കാനായി സ്‌കൂളിന് തൊട്ടു മുന്നിലെ റോഡില്‍ വരിയായി സ്‌കൂള്‍ അധികൃതരുടെ നേതൃത്വത്തില്‍ നിര്‍ത്തിയിരുന്നത്. ഇത് കണ്ട മന്ത്രി വളരെ കര്‍ക്കശമായി തന്നെ സ്‌കൂള്‍ അധികൃതരെ തന്റെ അതൃപ്തി അറിയിക്കുകയായിരുന്നു. ഇനി ഇത്തരം നടപടികള്‍ ഒഴിവാക്കാന്‍ പ്രത്യേക സര്‍ക്കുലര്‍ ഇറക്കണമോയെന്നും മന്ത്രി ചോദിച്ചു. സ്റ്റേജിലെത്തിയ ശേഷവും ഇതിനെതിരേ ശക്തമായ ഭാഷയില്‍ മന്ത്രി താക്കീത് ചെയ്യുകയും ചെയ്തു.