കാസര്‍കോട്: നഗരസഭയില്‍ മിന്നല്‍ പരിശോധനയ്‌ക്കെത്തിയ കലക്ടര്‍ ഡി. സജിത് ബാബു ഞെട്ടി. 63 ജീവനക്കാര്‍ വേണ്ടിടത്ത് ഓഫിസില്‍ ഉണ്ടായിരുന്നത് 19 പേര്‍ മാത്രം. അവധിയിലുള്ള രണ്ടുപേര്‍ ഒഴികെ മറ്റുള്ളവരെല്ലാം ഒപ്പിട്ട് മുങ്ങുകയായിരുന്നു. വൈകുന്നേരം 4.45 ഓടെയാണ് കലക്ടറും ഉന്നത ഉദ്യോഗസ്ഥരും നഗരസഭയില്‍ മിന്നല്‍ പരിശോധന നടത്തിയത്. അവധി ദിവസങ്ങള്‍ വരുന്നതിനു തലേ ദിവസം ഉദ്യോഗസ്ഥരെല്ലാം ഉച്ചക്ക് മുന്‍പുതന്നെ ഒപ്പിട്ട് മുങ്ങുന്നത് പതിവാണെന്ന പരാതി നിലനില്‍ക്കുന്നതിനിടയിലാണ് കലക്ടറുടെ നേതൃത്വത്തില്‍ നഗരസഭയില്‍ മിന്നല്‍ പരിശോധനയ്‌ക്കെത്തിയത്.
62 ജീവനക്കാരില്‍ 19 ജീവനക്കാര്‍ മാത്രമാണ് തല്‍സ്ഥാനങ്ങളിലുണ്ടായിരുന്നത്. രണ്ടു പേര്‍ അവധിയിലായിരുന്നു. ഇവരുടെ അവധി അപേക്ഷ ലഭിക്കുകയും ചെയ്തിട്ടുണ്ട്. നഗരസഭാ സെക്രട്ടറി സര്‍ക്കാരിന്റെ ഔദ്യോഗിക കോണ്‍ഫറന്‍സിനായി ചെയര്‍പേഴ്‌സണിനൊപ്പം മൂന്നാറിലാണ്.
41 പേരാണ് പ്രവര്‍ത്തി സമയത്തിനുമുന്‍പുതന്നെ മുങ്ങിയതായി കണ്ടെത്തിയത്. രണ്ടു വര്‍ഷം മുന്‍പ് നഗരസഭയില്‍ ഉദ്യോഗസ്ഥരുടെ മുങ്ങല്‍ തടയുന്നതിനായി പഞ്ചിങ് സംവിധാനം ഏര്‍പ്പെടുത്തിയിരുന്നു. എന്നാല്‍ അഞ്ചു മാസം മാത്രമാണ് പഞ്ചിങ് മെഷീന്‍ പ്രവര്‍ത്തിച്ചത്.
ഒന്നര വര്‍ഷത്തോളമായി പഞ്ചിങ് മെഷീന്‍ കേടായിക്കിടക്കുകയാണ്. പൊതുമേഖലാ സ്ഥാപനമായ കെല്‍ട്രോണ്‍ ആണ് നഗരസഭയില്‍ പഞ്ചിങ് മെഷീന്‍ ഒരുക്കിയത്. ഉദ്യോഗസ്ഥരുടെ കൃത്യവിലോപത്തിനെതിരേ ശക്തമായ നടപടി സ്വീകരിക്കുമെന്ന് കലക്ടര്‍ പറഞ്ഞു.