ദുബൈ: ഐ.സി.സി ഏകദിന ബാറ്റ്‌സ്മാന്‍മാരുടെ റാങ്കിങില്‍ ദക്ഷിണാഫ്രിക്കയുടെ എ.ബി ഡിവില്ല്യേഴ്‌സ് ഒന്നാം സ്ഥാനം തിരിച്ചുപിടിച്ചു. ആസ്‌ത്രേലിയന്‍ ഓപണര്‍ ഡേവിഡ് വാര്‍ണറെ പിന്തള്ളിയാണു ഡിവില്ല്യേഴ്‌സ് വീണ്ടും തലപ്പത്തെത്തിയത്. ഇതു പത്താം തവണയാണു ദക്ഷിണാഫ്രിക്കന്‍ താരം ഒന്നാം സ്ഥാനത്തെത്തുന്നത്. വാര്‍ണര്‍ രണ്ടാം സ്ഥാനത്തേക്കിറങ്ങിയപ്പോള്‍ ഇന്ത്യന്‍ നായകന്‍ വിരാട് കോഹ്‌ലി മൂന്നാം റാങ്ക് നിലനിര്‍ത്തി. അതേസമയം ഇംഗ്ലണ്ട് താരം ജോ റൂട്ട് നാലു സ്ഥാനങ്ങള്‍ മെച്ചപ്പെടുത്തി നാലാം റാങ്കിലെത്തി.
ബൗളര്‍മാരില്‍ ഇമ്രാന്‍ താഹിര്‍ ഒന്നാം സ്ഥാനത്തു തുടരുന്നു. ദക്ഷിണാഫ്രിക്കന്‍ താരം കഗിസോ റബാഡയാണു നേട്ടമുണ്ടാക്കിയത്. കരിയറില്‍ ആദ്യമായി താരം അഞ്ചാം റാങ്കിലേക്കു കുതിച്ചെത്തി. സുനില്‍ നരെയ്ന്‍ രണ്ടാമതും മിച്ചല്‍ സ്റ്റാര്‍ക്ക് മൂന്നാം സ്ഥാനത്തും ട്രെന്‍ഡ് ബോള്‍ട്ട് നാലാം സ്ഥാനത്തും നില്‍ക്കുന്നു. ആദ്യ പത്തില്‍ ഒരു ഇന്ത്യന്‍ ബൗളര്‍ക്കും സ്ഥാനമില്ല. ഓള്‍റൗണ്ടര്‍മാരില്‍ ബംഗ്ലാദേശ് താരം ഷാകിബ് അല്‍ ഹസനാണു ഒന്നാമത്. ഇന്ത്യന്‍ താരം രവീന്ദ്ര ജഡേജ പട്ടികയില്‍ പത്താം സ്ഥാനത്ത്.