കൊല്ലം: ഉപാസന നഴ്‌സിങ്് കോളജിലെ വിദ്യാര്‍ഥി സമരം ഒത്തുതീര്‍പ്പായി. ആരോപണ വിധേയയായ പ്രിന്‍സിപ്പലിനെ അന്വേഷണവിധേയമായി സസ്‌പെന്‍ന്റ് ചെയ്തു. പകരം വൈസ് പ്രിന്‍സിപ്പലിന് അധിക ചുമതല നല്‍കിയതായി മാനേജ്‌മെന്റ് അറിയിച്ചതോടെയാണ് ഒരഴ്ചയായി നടക്കുന്ന നിരാഹാര സമരം അവസാനിപ്പിക്കാന്‍ വിദ്യാര്‍ഥികള്‍ തയാറായത്. വിദ്യാര്‍ഥി സംഘടന പ്രതിനിധികള്‍ സിറ്റി പൊലിസ് കമ്മിഷണറുമായും മാനേജ്‌മെന്റ് പ്രതിനിധികളുമായും നടത്തിയ ചര്‍ച്ചയിലാണ് ഒത്തുതീര്‍പ്പ് തീരുമാനം.
ഫീസിനത്തില്‍ ഈടാക്കിയ അധിക തുക തിരിച്ചു നല്‍കുമെന്നും വിദ്യാര്‍ഥികള്‍ക്ക് എതിരെയുള്ള കേസുകള്‍ പിന്‍വലിക്കുമെന്നും ഒരു മാനേജ്‌മെന്റ് പ്രതിനിധി ആഴ്ചയില്‍ ഒരിക്കല്‍ കോളജിലെത്തി പരാതികള്‍ കേള്‍ക്കുമെന്നും മാനേജ്‌മെന്റ് പ്രതിനിധികള്‍ ഉറപ്പു നല്‍കി. കഴിഞ്ഞദിവസം വൈകിട്ട് നാലിന് സര്‍ക്കിള്‍ ഓഫിസില്‍ കൊല്ലം സിറ്റി പൊലിസ് കമ്മിഷണര്‍ സതീഷ് ബിനോ വിദ്യാര്‍ഥി പ്രതിനിധികളുമായി ചര്‍ച്ച നടത്തിയിരുന്നു. വിദ്യാര്‍ഥികള്‍ വിശദമായി പ്രശ്‌നങ്ങള്‍ കമ്മിഷണറെ ബോധിപ്പിക്കുകയും ചെയ്തിരുന്നു.
പിന്നീട് മാനേജ്‌മെന്റ് പ്രതിനിധികളുമായും ചര്‍ച്ച നടത്തിയിരുന്നു. നഴ്‌സിങ് കോളജിനു മുന്നില്‍ നിരാഹാരം നടത്തി വന്നിരുന്ന എ.ഐ.എസ്.എഫ് നേതാവ് ജെ ജയശങ്കറിന് സി.പി.ഐ അസിസ്റ്റന്റ് ജില്ലാ സെക്രട്ടറി ആര്‍. രാജേന്ദ്രന്‍ ഇളനീര് നല്‍കിയാണ് നിരാഹാര സമരം അവസാനിപ്പിച്ചത്. തുടര്‍ന്ന് വിദ്യാര്‍ത്ഥികളുടെ നേതൃത്വത്തില്‍ ആഹ്ലാദപ്രകടനം നടത്തി.