ആലുവ: നഗരത്തിലെ പ്രളയം ബാധിച്ച വ്യാപാരികളുടെ കൂട്ടായ്മ സംഘടിപ്പിക്കുന്ന വ്യാപാരോത്സവം 2019 'ഫെബ്രുവരി 16 മുതല്‍ ആരംഭിക്കും .ഫെഡറല്‍ ബാങ്കും ആലുവയിലെ ചലച്ചിത്ര താരങ്ങളുമടങ്ങുന്നവരുടെ സഹകരണത്തോടെ ഒരു മാസക്കാലം നീണ്ടു നില്‍ക്കുന്ന വിധത്തിലാണ് വ്യാപാരോത്സവം സംഘടിപ്പിക്കുന്നത്.
വ്യാപാരോത്സവ കാലയളവില്‍ നിശ്ചിത കടകളില്‍ നിന്ന് വാങ്ങുന്ന സാധനങ്ങളുടെ ബില്ലിനോടൊപ്പം സൗജന്യമായി ലഭിക്കുന്ന കൂപ്പണുകള്‍ നറുക്കെടുത്താണ് വിജയികളെ കണ്ടെത്തുന്നത്. ഒന്നാം സമ്മാനമായി രണ്ടുപേര്‍ക്ക് ബൈക്കുകളാണ് നല്‍കുന്നത്. രണ്ടാമത്തെ അഞ്ചുപേര്‍ക്ക് സൈക്കിളുകളും മൂന്നാമതായി പത്തുപേര്‍ക്ക് സ്വര്‍ണ നാണയങ്ങളും നല്‍കും. പ്രദേശത്തെ പ്രധാന വീഥികള്‍ വര്‍ണ പ്രപഞ്ചം ഒരുക്കും. ചലച്ചിത്ര താരങ്ങളുടെ മെഗാ ഷോയും ഉണ്ടാകും. പ്രളയ ബാധിത മേഖലകളായ ആലുവ പാലസ് റോഡ്, ബൈപ്പാസ് ജങ്ഷന്‍, മാര്‍ക്കറ്റ് ഭാഗങ്ങള്‍ എന്നിവിടങ്ങളിലെ വ്യാപാരികളാണ് വ്യാപാരോത്സവത്തില്‍ പങ്കാളികളാകുന്നത്. 16 ന് വൈകീട്ട് ആറുമണിക്ക് ബൈപാസ് കവലയില്‍ ഫ്‌ളാഗ് ഓഫ് നടക്കും. തുടര്‍ന്ന് മുനിസിപ്പല്‍ പാര്‍ക്കിന് സമീപമുള്ള ഗ്രൗണ്ടില്‍വച്ച് ഉദ്ഘാടനവും നടക്കും. പ്രളയബാധിത ആലുവയുടെ വീണ്ടെടുപ്പിനായി നടത്തുന്ന വ്യാപാരോത്സവത്തിന്റെ ലോഗോ പ്രകാശനം ചെയ്തു. ചലച്ചിത്രതാരം ടിനി ടോം ലോഗോ പ്രകാശനം നിര്‍വഹിച്ചു.
ആലുവ മഹാനാമി ഹോട്ടലില്‍ നടന്ന ലോഗോ പ്രകാശന ചടങ്ങില്‍ ജില്ല പഞ്ചായത്ത് വൈസ് പ്രസിഡന്റ് ബി.എ.അബ്ദുല്‍ മുത്തലിബ് അധ്യക്ഷത വഹിച്ചു. സംഘാടക സമിതി പ്രസിഡന്റ് സി.കെ. അബ്ദുല്ലകുട്ടി, സെക്രട്ടറി പി.എ.ബാബു, ഫെഡറല്‍ ബാങ്ക് ആര്‍.എസ്.എസ് ബ്രാഞ്ച് മാനേജര്‍ ടോമി, ആലുവ മര്‍ച്ചന്റ്‌സ് അസോസിയേഷന്‍ സെക്രട്ടറി എ.ജെ.റിയാസ് എന്നിവര്‍ പങ്കെടുത്തു.
അശാസ്ത്രീയ ഗതാഗത പരിഷ്‌ക്കാരവും ഈ മേഖലയിലെ കച്ചവടത്തെ ദോഷകരമായി ബാധിച്ചിട്ടുണ്ട്. നഗരത്തിന്റെ മറ്റെല്ലാ ഭാഗത്തും അശാസ്ത്രീയ ഗതാഗത പരിഷ്‌ക്കാരം പിന്‍വലിച്ചെങ്കിലും ;ഏറ്റവും വീതിയേറിയ റോഡുള്ള പാലസ് റോഡില്‍ ഇപ്പോഴും ഭാഗിക ഗതാഗത സൗകര്യം മാത്രമേ ഉള്ളൂ. ഈ പ്രദേശത്ത് വണ്‍വേ സംവിധാനത്തില്‍ ആവശ്യമായ മാറ്റങ്ങള്‍ വരുത്തണമെന്ന് സംഘാടകര്‍ അധികൃതരോട് അഭ്യര്‍ത്ഥിച്ചു. പമ്പ് കവലയില്‍ നിന്ന് പ്രളയബാധിത മേഖലയിലെ പ്രധാന റോഡായ പാലസ് റോഡിലേക്കും പാലസ് റോഡില്‍ നിന്ന് നേരിട്ട് ബ്രിഡ്ജ് റോഡിലേക്കും പ്രവേശിക്കാന്‍ നിലനില്‍ക്കുന്ന തടസം മാറ്റണമെന്നും അഭ്യര്‍ഥിച്ചു.