ബെര്‍നെ: മിനി ലോകകപ്പിന്റെ സാധ്യതകള്‍ തേടി ഫിഫ. നാല് വര്‍ഷത്തിനിടെ 32 ടീമുകള്‍ പങ്കെടുക്കുന്ന ലോകകപ്പിന് പുറമേ രണ്ട് വര്‍ഷം കൂടുമ്പോള്‍ എട്ട് ടീമുകള്‍ മാറ്റുരയ്ക്കുന്ന രീതിയില്‍ മിനി ലോകകപ്പ് ഫുട്‌ബോള്‍ സംഘടിപ്പിക്കാനുള്ള നിര്‍ദേശമാണ് ഫിഫ മുന്നോട്ടുവച്ചത്.
പ്രസിഡന്റ് ജിയോവാനി ഇന്‍ഫാന്റിനോയാണ് പുതിയ പദ്ധതിയെക്കുറിച്ചുള്ള ആലോചനയുടെ പിന്നില്‍. രാജ്യാന്തര മത്സരങ്ങള്‍ സംഘടിപ്പിച്ച് ആദ്യമെത്തുന്ന ഏറ്റവും മികച്ച എട്ട് ടീമുകള്‍ മാറ്റുരയ്ക്കുന്ന തരത്തിലാണ് ടൂര്‍ണമെന്റ് വിഭാവനം ചെയ്തിരിക്കുന്നത്. മിനി ലോകകപ്പ് 2021 മുതല്‍ തുടങ്ങാനാണ് ആലോചന നടക്കുന്നത്. രണ്ട് വര്‍ഷം കൂടുമ്പോള്‍ ഒക്ടോബര്‍, നവംബര്‍ മാസത്തില്‍ നടത്തുകയാണ് ഫിഫയുടെ ലക്ഷ്യം.
നാല് വര്‍ഷം കൂടുമ്പോള്‍ നടത്തുന്ന കോണ്‍ഫെഡറേഷന്‍സ് കപ്പ് ഒഴിവാക്കി പകരം മിനി ലോകകപ്പ് നടത്തുകയെന്ന ആശയവും ഫിഫയുടെ പരിഗണനയില്‍ ഉണ്ട്. യൂറോ കപ്പ്, കോപ്പ അമേരിക്ക, ആഫ്രിക്കന്‍ നാഷന്‍സ് കപ്പ് അടക്കമുള്ള ടൂര്‍ണമെന്റുകള്‍ വഴി ടീമുകളെ കണ്ടെത്തുകയെന്ന നിര്‍ദേശവും ഉണ്ട്.
ഫിഫയുടെ നിര്‍ദേശം തീരുമാനങ്ങള്‍ എടുക്കുന്ന കൗണ്‍സിലിന്റെ പരിഗണനയ്ക്ക് വിട്ടിരിക്കുകയാണിപ്പോള്‍. നേരത്തെ ഇന്‍ഫാന്റിനോ ലോകകപ്പില്‍ 32 ടീമുകള്‍ക്ക് പകരം 48 ടീമുകളെന്ന പുതിയ ആശയം മുന്നോട്ടുവച്ചിരുന്നു.
2026ലെ ലോകകപ്പ് മുതല്‍ ടീമുകളുടെ എണ്ണം കൂട്ടാനാണ് നിലവില്‍ ഫിഫ ആലോചിക്കുന്നത്.