പെരിന്തല്‍മണ്ണ: വാഹനത്തില്‍ മദ്യവില്‍പന നടത്തുന്ന യുവാവിനെ എക്‌സൈസ് സംഘം പിടികൂടിയ സംഭവത്തില്‍ അന്വേഷണം തുടങ്ങി. പിടിയിലായ യുവാവ് 19 കുപ്പി മദ്യവുമായി പുഴക്കാട്ടിരി കടുങ്ങപുരം പരവക്കല്‍, കടുങ്ങപുരം ഭാഗങ്ങളില്‍ വാഹനത്തില്‍ കൊണ്ടുനടന്ന് മദ്യം വില്‍ക്കുന്നയാളാണെന്ന് എക്‌സൈസ് പറഞ്ഞു.
പരവക്കലില്‍നിന്ന് പെരിന്തല്‍മണ്ണ റെയ്ഞ്ച് എക്‌സൈസ് ഇന്‍സ്‌പെക്ടര്‍ എന്‍.ഇ ഉണ്ണികൃഷ്ണന്‍ നമ്പൂതിരിയും സംഘവുമാണ് ഇയാളെ അറസ്റ്റ് ചെയ്തത്. മദ്യം കടത്താനുപയോഗിച്ച കാറും പിടിച്ചെടുത്തിട്ടുണ്ട്. പുഴക്കാട്ടിരി, പരവക്കല്‍ ഭാഗങ്ങളില്‍ ഏതു സമയത്തും ആവശ്യക്കാര്‍ക്ക് മദ്യം എത്തിച്ചുനല്‍കുന്നതായ വിവരത്തില്‍ നടത്തിയ നിരീക്ഷണത്തിലാണ് ഇയാള്‍ പിടിയിലായത്.
ഫോണില്‍ ബന്ധപ്പെടുന്നവര്‍ക്ക് ഏതുസമയത്തും മദ്യമെത്തിക്കുന്ന യുവാവ് ബിവറേജസില്‍നിന്നും മാഹിയില്‍നിന്നും വിദേശമദ്യം ശേഖരിച്ച് ചില്ലറവില്‍പന നടത്തുന്നയാളാണെന്നും എക്‌സൈസ് അധികൃതര്‍ പറഞ്ഞു. മുന്‍പു പിടിയിലായി ജയിലില്‍ കഴിഞ്ഞിട്ടുള്ളയാളാണ് പ്രതിയെന്നും ഇയാള്‍ക്കു മദ്യം എത്തിക്കുന്നവരെക്കുറിച്ച് അന്വേഷണം തുടങ്ങിയതായും അധികൃതര്‍ പറയുന്നു.
സിവില്‍ എക്‌സൈസ് ഓഫിസര്‍മാരായ സജയകുമാര്‍, പി.എച്ച് പ്രത്യുഷ്, പി. അനീഷ്‌കുമാര്‍, ശംസുദ്ദീന്‍, പി.കെ ഇന്ദുദാസ് എന്നിവരും എക്‌സൈസ് സംഘത്തിലുണ്ടായിരുന്നു.