ഫറോക്ക്: പുറ്റേക്കാട് മഹല്ല് ജുമാഅത്ത് പള്ളി കമ്മിറ്റി തെരഞ്ഞെടുപ്പ് ജൂലൈ 17ന് നടത്തുമെന്ന് റിട്ടേണിങ് ഓഫിസര്‍ അഡ്വ.കെ സാദിഖ് അറിയിച്ചു. രാവിലെ ഒന്‍പത് മുതല്‍ വൈകീട്ട് നാലു വരെയാണ് തെരഞ്ഞെുപ്പ്. അഞ്ചു മണിക്ക് വോട്ടെണ്ണി വിജയികളെ പ്രഖ്യാപിക്കും. ഈ മാസം 25 അഞ്ച് വരെ പത്രിക സ്വീകരിക്കും.26ന് വൈകീട്ട് നാലരക്ക് സൂക്ഷ്മപരിശോധന നടത്തി. 27ന് നാലരക്ക് സ്ഥാനാര്‍ഥികളെ പ്രഖ്യാപിക്കും. 30 ന് നാലു മണി വരെ പിന്‍വലിക്കാം.
അടുത്ത മൂന്ന് വര്‍ഷത്തേക്കുള്ള 20 അംഗ പ്രവര്‍ത്തക സമിതിയെയാണ് തെരഞ്ഞെടുക്കുന്നത്. ഒന്നില്‍ 20 പേര്‍ വീതമുള്ള പാനലുകളാണ് മത്സരിക്കേണ്ടത്. എത്ര പാനലുകള്‍ക്കും മത്സരിക്കാം. ഓരോ പാനലിലേയും മത്സരാര്‍ഥികള്‍ പേര്, വിലാസം, വയസ് എന്നിവ എഴുതി ഓരോരുത്തരും ഒപ്പിടണം.വിലാസമടക്കമുള്ളവ തെളിയിക്കാന്‍ രേഖകളുടെ കോപ്പി ഹാജരാക്കണം. ബന്ധപ്പെട്ട ദിവസങ്ങളില്‍ റിട്ടേണിങ് ഓഫിസര്‍ റഹ്മാനിയ സെക്കന്‍ഡറി മദ്‌റസയിലുണ്ടാകും.അല്ലാത്ത ദിവസങ്ങളില്‍ കോഴിക്കോട് പി.എം താജ് റോഡിലെ എസ്.എം.ആര്‍ക്കേഡ് രണ്ടാം നിലയില്‍ കെ.ആര്‍ കെ.എന്‍ അസോസിയേറ്റ്‌സി ലെ ഓഫിസിലുണ്ടാകും.