കൊച്ചി: കേരള ബ്ലാസ്റ്റേഴ്‌സിന്റെ പരിശീലകനായി നിയമിതനായ ഇംഗ്ലീഷ് കോച്ച് സ്റ്റീവ് കോപ്പല്‍ ഇന്ത്യയിലെത്തി. സൗകര്യങ്ങള്‍ വിലയിരുത്തുന്നതിനും ടീമുകളുമായി ചര്‍ച്ചയ്ക്കുമായാണ് കോപ്പല്‍ ഇന്ത്യയിലെത്തിയത്.

ഗുണമേന്മയുള്ള ഇന്ത്യന്‍ ഫുട്‌ബോള്‍ വളര്‍ത്തിയെടുക്കുന്നതിനു കഴിഞ്ഞ രണ്ടു സീസണിലൂടെ ഇന്ത്യന്‍ സൂപ്പര്‍ ലീഗ് മികച്ച അടിത്തറയിട്ടതായി സ്റ്റീവ് കോപ്പല്‍ പറഞ്ഞു. സവിശേഷമായ ഫോര്‍മാറ്റില്‍ അന്താരാഷ്ട്ര രംഗത്തുള്ളവരുമായി മത്സരിക്കാന്‍ ഇന്ത്യന്‍ കളിക്കാര്‍ക്ക് അവസരമൊരുക്കുന്നതിനും ഇന്ത്യയില്‍ ഫുട്‌ബോളിന്റെ വേരുകള്‍ ശക്തിപ്പെടുത്തുന്നതിനും ഐ.എസ്.എല്‍ സഹായിക്കും.

കളിക്കാര്‍ക്കായി മികച്ച സാഹചര്യങ്ങള്‍ ഒരുക്കുന്നതിലും കളികളില്‍ വിജയം നേടുന്നതിലുമാണ് താന്‍ വിശ്വസിക്കുന്നത്. ടീമുമായി ചേര്‍ന്ന് ഫുട്‌ബോളിനോടുള്ള തന്റെ താത്പര്യം പങ്ക് വയ്ക്കുന്നതിനു പരിശ്രമിക്കുമെന്നും കോപ്പല്‍ പറഞ്ഞു. മുപ്പതിലധികം വര്‍ഷത്തെ അനുഭവത്തിന്റെ കരുത്തുമായാണ് കോപ്പല്‍ ടീമിനൊപ്പം ചേരുന്നത്.

കേരള ബ്ലാസ്റ്റേഴ്‌സ് കുടുംബത്തിലേയ്ക്ക് സ്റ്റീവ് കോപ്പലിനെ സ്വാഗതം ചെയ്യുന്നതില്‍ സന്തോഷമുണ്ടെന്ന് അധികൃതര്‍ പറഞ്ഞു.