കോഴിക്കോട്: പൊലിസ് ഉദ്യോഗസ്ഥരുടെ ശമ്പളത്തില്‍ നിന്ന് അനുവാദമില്ലാതെ അസോസിയേഷനുകള്‍ തുക പിരിച്ചെടുക്കുന്നതിനെ കുറിച്ച് അന്വേഷിക്കണമെന്ന് സംസ്ഥാന മനുഷ്യാവകാശ കമ്മിഷന്‍.
സംസ്ഥാന പൊലിസ് മേധാവി അന്വേഷിച്ച് ഒരു മാസത്തിനകം റിപ്പോര്‍ട്ട് സമര്‍പ്പിക്കണമെന്ന് ആക്ടിംഗ് അധ്യക്ഷന്‍ പി. മോഹനദാസ് ആവശ്യപ്പെട്ടു.
സമൂഹത്തെ നിയമാനുസരണം സേവിക്കാന്‍ ആവശ്യമായ സാഹചര്യം പൊലിസ് ഉദ്യോഗസ്ഥര്‍ക്ക് നല്‍കണമെന്നും കമ്മിഷന്‍ ആവശ്യപ്പെട്ടു. ഉദ്യോഗസ്ഥരുടെ അനുവാദമില്ലാതെ പണപ്പിരിവ് നടക്കുന്നുണ്ടെങ്കില്‍ അവസാനിപ്പിക്കാനുള്ള കര്‍ശന നിര്‍ദേശം പൊലിസ് മേധാവി നല്‍കണമെന്നും ഉത്തരവില്‍ പറഞ്ഞു.
ശമ്പളത്തില്‍ നിന്നു വിവിധ ആവശ്യങ്ങള്‍ക്കായി അനുവാദം ഇല്ലാതെ പണം ഈടാക്കുന്നുവെന്നാണ് പരാതി. ശമ്പളത്തില്‍ നിന്ന് പണം പിരിക്കണമെങ്കില്‍ ഉദ്യോഗസ്ഥര്‍ രേഖാമൂലം എഴുതി നല്‍കണം. എന്നാല്‍ അസോസിയേഷന്‍ സെക്രട്ടറി ജില്ലാ പൊലിസ് മേധാവിയോട് പണം പിരിച്ചു നല്‍കാന്‍ ആവശ്യപ്പെടുകയാണ് പതിവ്.
ശമ്പളം കൈയില്‍ കിട്ടിയ ശേഷമാണ് ഉദ്യോഗസ്ഥര്‍ ഇക്കാര്യം അറിയുന്നതെന്നും പരാതിയുണ്ട്. പത്രവാര്‍ത്തയുടെ അടിസ്ഥാനത്തില്‍ സ്വമേധയാ രജിസ്റ്റര്‍ ചെയ്ത കേസിലാണ് നടപടി.