ഡബ്ലിന്‍: അയര്‍ലന്‍ഡിന്റെ ആദ്യ അന്താരാഷ്ട്ര ടെസ്റ്റ് മത്സരത്തിനുള്ള 14 അംഗ ടീമിനെ പ്രഖ്യാപിച്ചു. വെറ്ററന്‍ ബാറ്റ്‌സ്മാന്‍ വില്ല്യം പോര്‍ട്ടര്‍ഫീല്‍ഡാണ് ടീമിന്റെ ക്യാപ്റ്റന്‍. ഈ മാസം 11ന് പാകിസ്താനെയാണ് ടെസ്റ്റ് പദവി സ്വന്തമായ ശേഷമുള്ള കന്നി പോരില്‍ അയര്‍ലന്‍ഡ് നേരിടാനൊരുങ്ങുന്നത്.
പോര്‍ട്ടര്‍ഫീല്‍ഡിനൊപ്പം പരിചയ സമ്പന്നരായ നീല്‍, കെവിന്‍ ഒബ്രയാന്‍ സഹോദരന്‍മാര്‍, എഡ് ജോയ്‌സ് അടക്കമുള്ള താരങ്ങളും ടീമില്‍ ഇടംപിടിച്ചിട്ടുണ്ട്. കഴിഞ്ഞ വര്‍ഷമാണ് ഐ.സി.സി അയര്‍ലന്‍ഡിനും അഫ്ഗാനിസ്ഥാനും ടെസ്റ്റ് പദവി അനുവദിച്ചത്. അയര്‍ലന്‍ഡ് കന്നി ടെസ്റ്റില്‍ പാകിസ്താനെ നേരിടുമ്പോള്‍ ജൂണ്‍ 14ന് തങ്ങളുടെ ആദ്യ അന്താരാഷ്ട്ര ടെസ്റ്റില്‍ അഫ്ഗാനിസ്ഥാന്‍ ഇന്ത്യയുമായി ഏറ്റുമുട്ടും.