കണ്ണൂര്‍: നഗരത്തിലെ ഓവുചാലുകളില്‍ നിന്നു കടുത്തദുര്‍ഗന്ധം വമിക്കുന്നു. ഇതുകാരണം പലയിടങ്ങളിലും മൂക്കുപൊത്തി നടക്കേണ്ട ഗതികേടിലാണ് വഴിയാത്രക്കാര്‍. തെക്കിബസാര്‍, പ്ലാസ, കാല്‍ടെക്‌സ്, പഴയബസ് സ്റ്റാന്‍ഡ് തുടങ്ങിയ സ്ഥലങ്ങളില്‍ ഓവുചാലുകളിലെ സ്ലാബുകള്‍ക്കിടയില്‍ നിന്നു കടുത്ത ദുര്‍ഗന്ധമാണ് വമിക്കുന്നത്. ജില്ലയിലെ ചില ആശുപത്രികള്‍, ഹോട്ടലുകള്‍ എന്നിവയില്‍ നിന്നു അഴുക്കുവെള്ളം ഇതിലേക്കാണ് തുറന്നുവിടുന്നത്. കക്കൂസ് മാലിന്യത്തിന്റെ പൈപ്പുകള്‍ പലയിടങ്ങളിലും ഓവുചാലുമായി ബന്ധിതമാണ്. വൈകുന്നേരമാണ് തെക്കിബസാറില്‍ ആശുപത്രി മാലിന്യം തുറന്നുവിടുന്നത്. ഈ സമയത്ത് അസഹനീയമായ ദുര്‍ഗന്ധം അനുഭവപ്പെടുന്നതായി വ്യാപാരികള്‍ പറയുന്നു. നഗരത്തിലെ തട്ടുകടകളും ഹോട്ടലുകളും കൂടുതല്‍ പ്രവര്‍ത്തിക്കുന്നത് ഓവുചാലിനരികെയാണ്.