ആലുവ: ഹോട്ടലില്‍ മോഷണം നടത്തിയ കള്ളനെ ഉടമകള്‍ ചേര്‍ന്ന് രാത്രിയോടെ പിടികൂടി പൊലിസിനു കൈമാറി. ശനിയാഴ്ച്ച പുലര്‍ച്ചെ 3.30നാണ് ആലുവ പുളിഞ്ചു വട് കവലയിലുള്ള മിന്‍ഹ റെസ്റ്റോറന്റില്‍ മോഷണം നടന്നത്.
രാവിലെ കട തുറന്നപ്പോള്‍ മോഷണം നടന്നത് ശ്രദ്ധയില്‍പ്പെട്ടതോടെ കടയിലെ സി.സി ടി.വി ദൃശ്യം പരിശോധിക്കുകയായിരുന്നു. പുലര്‍ച്ചെ 3.30 യോടെ കടയില്‍ പ്രവേശിച്ച മോഷ്ടാവ് കൗണ്ടറില്‍ നിന്നും പണവും വ്യാപാരി കാരുണ്യനിധിയുടെയും പള്ളിയുടെയും സംഭാവന പെട്ടിയും മോഷ്ടിക്കുന്നതും അരമണിക്കൂറോളം കടയില്‍ ചിലവഴിക്കുന്നതിന്റെയും ദൃശ്യങ്ങള്‍ കൃത്യമായി പതിഞ്ഞിരുന്നു.
ടി ഷര്‍ട്ടും നിക്കറും ധരിച്ച മോഷ്ടാവിന്റെ ടി ഷര്‍ട്ടിന്റെ പുറകില്‍ 9 എന്നും ഇംഗ്ലീഷില്‍ ബലോട്ടെല്ലി എന്നും എഴുതിയിരുന്നു. ഉടമകള്‍ പൊലിസില്‍ പരാതി നല്‍കിയെങ്കിലും വി.ഐ.പി ഡ്യൂട്ടി തിരക്കില്‍ ആയതു കൊണ്ട് അന്വേഷിക്കാന്‍ ആരും എത്തിയില്ല. പരാതിക്ക് രസീത് ആവശ്യപ്പെട്ടിട്ടും ഡ്യൂട്ടിയില്‍ ഉണ്ടായിരുന്ന ഉദ്യോഗസ്ഥന്‍ നല്‍കിയില്ലെന്നും ആക്ഷേപം ഉണ്ട്.
എന്നാല്‍ ശനിയാഴ്ച്ച രാത്രി 11 മണിയോടെ പുളിഞ്ചുവട് കവലയില്‍ വെച്ച് മോഷ്ടാവിനെ ഉടമകളില്‍ ഒരാള്‍ തിരിച്ചറിയുകയും പിടികൂടുകയുമായിരുന്നു. തമിഴ്‌നാട് കോയമ്പത്തൂര്‍ സ്വദേശിയാണ് പിടിയിലായ മോഷ്ടാവ്. ഉടമകള്‍ പൊലിസിനെ വിളിച്ചു വരുത്തി കള്ളനെ കൈമാറി