ലണ്ടന്‍:ഇന്ത്യയെ കൊള്ളയടിച്ച് നശിപ്പിച്ച ബ്രിട്ടീഷുകാരുടെ കോളനിവാഴ്ചക്കെതിരേ കടുത്ത വിമര്‍ശനവുമായി ശശി തരൂര്‍ എം.പിയുടെ ലേഖനം. അല്‍ജസീറയിലാണ് ബ്രിട്ടീഷ് ഭരണത്തിന്റെ കറുത്ത ഓര്‍മകള്‍ പങ്കുവയ്ക്കുന്ന ലേഖനം വന്നത്. ബ്രിട്ടീഷ് ഭരണകാലത്ത് 3.5കോടിയിലധികം പേര്‍ ഇന്ത്യയില്‍ കൊല്ലപ്പെട്ടു. കൊല്‍ക്കത്തയിലെ വിക്ടോറിയ സ്മാരകം ബ്രിട്ടീഷ് ക്രൂരത വെളിവാക്കുന്ന മ്യൂസിയമാക്കി മാറ്റണമെന്നും ലേഖനം പറയുന്നു.
1700കളില്‍ ലോകത്തെ ഏറ്റവും സമ്പന്നരാജ്യമായിരുന്നു ഇന്ത്യ. ആഗോള ജി.ഡി.പിയുടെ 27 ശതമാനം ഇന്ത്യയുടേതായിരുന്നു. രണ്ട് നൂറ്റാണ്ടുകാലത്തെ കൊള്ളയ്ക്കും ചൂഷണത്തിനും ശേഷം1947ല്‍ രാജ്യം സ്വതന്ത്രമാകുമ്പോള്‍ ഇന്ത്യ ദരിദ്രരായി.
മത്സരമില്ലാതാക്കാന്‍ ഇംഗ്ലിഷുകാര്‍ ധാക്കയിലെയും മുര്‍ഷിദാബാദിലെയും തുണിമില്ലുകളെ തകര്‍ത്തു. ആസൂത്രിതമായി തുണിവ്യവസായത്തെ നശിപ്പിക്കുകയാണ് അവര്‍ ചെയ്തത്. ലോകത്തിലെ ഏറ്റവും വലിയ വസ്ത്രക്കയറ്റുമതിക്കാര്‍ ഒടുവില്‍ ഇംഗ്ലണ്ടില്‍നിന്ന് വസ്ത്രങ്ങള്‍ ഇറക്കുമതി ചെയ്യുന്നവരായി.
ജാലിയന്‍വാലാബാഗ് കൂട്ടക്കൊല നടന്ന സ്ഥലത്ത് ബ്രിട്ടന്‍ നേതാക്കള്‍ മുട്ടുകുത്തുന്നത് കാണാന്‍ ആഗ്രഹമുണ്ട്. ജാലിയന്‍വാലാബാഗ് കൂട്ടക്കൊലയുടെ നൂറാം വാര്‍ഷികം എത്താനിരിക്കെ ഇന്ത്യയില്‍ ഇരുനൂറു വര്‍ഷത്തെ കോളനി ഭരണത്തിനു രാജകുടുംബമോ പ്രധാനമന്ത്രിയോ പ്രായശ്ചിത്തം ചെയ്യുന്നതു കാണാന്‍ ആഗ്രഹമുണ്ട്.
കൊളോണിയല്‍ കാലഘട്ടത്തിലെ ഏറ്റവും വലിയ അഴിമതിയുടെ ബാക്കിപത്രമാണ് ഇന്ത്യന്‍ റെയില്‍വേ. റെയില്‍ ശൃംഖല നിര്‍മിച്ചതിന്റെ പേരില്‍ ബ്രിട്ടനോടു നന്ദിയുള്ളവരായിരിക്കണമെന്ന നിലപാടു ശരിയല്ല. ഇന്ത്യയുടെ വിവിധ ഭാഗങ്ങളില്‍നിന്ന് അസംസ്‌കൃത വസ്തുക്കള്‍ കൊണ്ടുപോകാന്‍ അവര്‍ കണ്ടെത്തിയ മാര്‍ഗമായിരുന്നു റെയില്‍ പാത. ഉള്‍നാടന്‍ മേഖലകളിലേക്കു സൈനികരെയും ജോലിക്കാരെയും എത്തിക്കുകയെന്നതും അവരുടെ ലക്ഷ്യമായിരുന്നു.
ബ്രിട്ടിഷുകാര്‍ ഇന്ത്യയില്‍ ഏറ്റവും ലാഭകരമായ നിക്ഷേപം നടത്തിയതും റെയില്‍വേയിലാണ്. ടിക്കറ്റ് കലക്ടര്‍, സ്റ്റേഷന്‍ മാസ്റ്റര്‍ തുടങ്ങിയ ജോലികളില്‍ യൂറോപ്പുകാരെ മാത്രം നിയമിച്ച് വിവേചനം കാട്ടി. തടി ബെഞ്ചുള്ള മൂന്നാം ക്ലാസ് കംപാര്‍ട്ട്‌മെന്റുകളിലെ യാത്രയ്ക്ക് ഇന്ത്യക്കാരില്‍നിന്ന് അവര്‍ കൊള്ളനിരക്ക് ഈടാക്കി.