ഫറോക്ക്: സാമുഹ്യവിരുദ്ധര്‍ ഫറോക്ക് പഴയ പാലത്തിലെ സിഗ്‌നല്‍ ലൈറ്റുകള്‍ ദിശ തിരിച്ചുവച്ചു. പാലത്തിലെ ഗതാഗതകുരുക്ക് നിയന്ത്രിക്കുന്നതിനായി രണ്ടു മാസം മുന്‍പ് സ്ഥാപിച്ച സിഗ്‌നല്‍ ലൈറ്റാണിത്. ചെറുവണ്ണൂര്‍ ഭാഗത്തുനിന്നു പാലത്തിലേക്ക് കയറുന്ന ഭാഗത്തെ ലൈറ്റാണ് റെയില്‍ പളത്തിന്റെ ഭാഗത്തേക്ക് തിരിച്ചുവച്ചിരിക്കുന്നത്.
പഴയ പലാത്തിനടിയിലും പരിസരപ്രദേശങ്ങളിലും സാമുഹ്യവിരുദ്ധര്‍ അഴിഞ്ഞാട്ട കേന്ദ്രമാക്കിയിരിക്കുകയാണ്. പൊതുമുതലുകള്‍ നശിപ്പിക്കുന്നത് ഇവിടെ പതിവായിരിക്കുകയാണെന്നാണ് നാട്ടുകാരുടെ ആരോപണം.
പ്രദേശത്ത് ആവശ്യത്തിനു വെളിച്ചമില്ലാത്തതാണ് സാമുഹ്യവിരുദ്ധര്‍ ഇവിടെ താവളമാക്കാന്‍ കാരണം. പാലത്തിനോട് ചേര്‍ന്നുളള സ്ട്രീറ്റ് ലൈറ്റ് കണ്ണടച്ചിട്ട് മാസങ്ങളായി. ലൈറ്റിന്റെ ചില്ലുകളും മറ്റും സാമുഹ്യവിരുദ്ധര്‍ എറിഞ്ഞു തകര്‍ത്തിട്ടുണ്ട്. നാട്ടുകാര്‍ നിരവധി തവണ പരാതിപ്പെട്ടിട്ടും ലൈറ്റ് പുനസ്ഥാപിക്കുന്നതിനു കോര്‍പറേഷന്‍ ഭാഗത്തുനിന്നു യാതൊരു നടപടിയുമുണ്ടായിട്ടില്ല.