മഞ്ചേരി: ആനക്കയം വീട്ടിപ്പടിയില്‍ വീടിനു തീപിടിച്ചു ലക്ഷങ്ങളുടെ നാശനഷ്ടം. അറക്കല്‍ അബ്ദുര്‍റഹിമാന്‍ മുസ്‌ലിയാരുടെ വീടിനാണ് ഇന്നലെ വൈകിട്ട് നാലോടെ തീപിടിച്ചത്. വൈദ്യുതി ഷോട്ട്‌സര്‍ക്യൂട്ടാണ് കാരണമെന്നാണ് നിഗമനം.
വീട്ടുകാര്‍ പുറത്തുപോയതായിരുന്നു. വീടിന്റെ മുകളില്‍നിന്നു പുക ഉയരുന്നതും ഉയര്‍ന്ന ശബ്ദത്തോടെ ഓടുകള്‍ പൊട്ടിത്തെറിക്കുന്നതും കണ്ടതോടെ അയല്‍വാസികള്‍ ഓടിയെത്തി മഞ്ചേരി അഗ്നിശമനസേനയെ വിവരമറിയിക്കുകയായിരുന്നു. വീട്ടിലെ പ്രധാന ഫര്‍ണിച്ചറുകളും മറ്റ് ഉപകരണങ്ങളും കത്തിനശിച്ചിട്ടുണ്ട്. അഗ്നിശമന സേനയുടേയും പ്രദേശവാസികലുടെയും സമയോചിതമായ ഇടപെടല്‍മൂലം ഗ്യാസ് സിലിണ്ടര്‍ ഉള്‍പ്പെടെയുള്ള ഉപകരണങ്ങളിലേക്കു തീ പടരാതെ സംരക്ഷിക്കാനായി. വീട്ടിലെ പ്രധാന രേഖകളൊന്നു നശിച്ചിട്ടില്ല.  മഞ്ചേരി ഫയര്‍‌സ്റ്റേഷന്‍ അസിസ്റ്റന്റ് ഓഫിസര്‍ പി.ടി ഉമ്മറിന്റെ നേതൃത്വത്തില്‍ മുഹമ്മദ് ശമീം, പ്രദീപ്കുമാര്‍, വിപിന്‍, നിസാമുദ്ദീന്‍ തുടങ്ങിയ സേനാംഗങ്ങളാണ് തീ അണച്ചത്.