ആലപ്പുഴ: ചെങ്ങന്നൂര്‍ ഉപതെരഞ്ഞെടുപ്പ് സംസ്ഥാന സര്‍ക്കാരിന്റെ ഭരണ നേട്ടങ്ങളുടെ വിലയിരുത്തലാണെന്ന് പ്രഖ്യാപിച്ച സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ മലക്കം മറിഞ്ഞു. സംസ്ഥാനത്ത് ജനരോഷം ഏറ്റുവാങ്ങിയ സര്‍ക്കാരിന് ചെങ്ങന്നൂരില്‍ ജയിക്കാന്‍ കഴിയില്ലെന്ന ധാരണ പരന്നതാണ് പാര്‍ട്ടി സെക്രട്ടറിയുടെ ചാഞ്ചാട്ടത്തിനു പിന്നിലെന്നാണ് ജനസംസാരം.
കഴിഞ്ഞദിവസം സി.പി.എം നിരണം ലോക്കല്‍ കമ്മിറ്റി ഓഫിസിന്റെ ശിലാസ്ഥാപനത്തിനിടയിലാണ് കോടിയേരി മനസിലിരിപ്പ് പുറത്തറയിച്ചത്.'ഒരു തെരഞ്ഞെടുപ്പില്‍ തോറ്റാല്‍ എല്ലാം അവസാനിച്ചെന്ന് പാര്‍ട്ടി കരുതുന്നില്ല, എല്ലാ തെരഞ്ഞെടുപ്പുകളിലും ജയിക്കണമെന്നുമില്ല.
ഇത് കണ്ട് ഭയക്കുന്നവരുമല്ല പാര്‍ട്ടി പ്രവര്‍ത്തകര്‍. സി.പി.എം പറയുന്നതും ചെയ്യുന്നതുമായ കാര്യങ്ങള്‍ ശരിയാണെന്ന് ജനങ്ങള്‍ക്ക് മനസിലായിട്ടുണ്ട്. അതിന്റെ ഫലം ഉണ്ടാകും. പാര്‍ട്ടി സെക്രട്ടറിയുടെ ഏറ്റുപറച്ചില്‍ ഇടതുമുന്നണിക്ക് ദോഷമാണ് വരുത്തിയിട്ടുള്ളതെന്നാണ് വിലയിരുത്തല്‍.
നേരത്തെ പാര്‍ട്ടിയുടെ തെരഞ്ഞെടുപ്പ് പ്രചാരണായുധങ്ങളും പോസ്റ്ററുകളും ബൂത്ത് ഓഫിസുകളും യു.ഡി.എഫ് തകര്‍ക്കുന്നതായി ആരോപിച്ചിരുന്നു.