ആറ്റിങ്ങല്‍:കിണര്‍ വൃത്തിയാക്കുന്നതിനിടെ , ചെളി നിറച്ച ബക്കറ്റ് തലയില്‍ വീണ് പരുക്കേറ്റ് അബോധാവസ്ഥയിലായ തൊഴിലാളിയെ  ഫയര്‍ഫോഴ്‌സ് രക്ഷപ്പെടുത്തി. മേല്‍കടയ്ക്കാവൂര്‍ പഴഞ്ചിറ വീട്ടില്‍ സജീവാണ്(34) കിണറിനുള്ളില്‍ കുടുങ്ങിയത്.
ചെറുവള്ളിമുക്ക് പാവൂര്‍ക്കോണം ഷംനാദിന്റെ വീട്ടിലെ കിണര്‍ വൃത്തിയാക്കുന്നതിനിടെയായിരുന്നു അപകടം. വിവരമറിഞ്ഞ് ആറ്റിങ്ങല്‍ ഫയര്‍ സ്റ്റേഷനിലെ സ്റ്റേഷന്‍ ഓഫിസര്‍ ഗില്‍ബര്‍ട്ടിന്റെ നേതൃത്വത്തില്‍  സജിത് ലാല്‍, അനീഷ്, ദിനേശ്, നാരായണന്‍ നായര്‍, ബാഹുലേയന്‍ നായര്‍ , ഫയര്‍ ഡ്രൈവര്‍ ഷമ്മി, മെക്കാനിക് ഷാജി എന്നിവര്‍ സ്ഥലത്തെത്തിയാണ് രക്ഷാപ്രവര്‍ത്തനം നടത്തിയത്.
ആശുപത്രിയില്‍ പ്രവേശിപ്പിച്ച സജീവ്  അപകട നില തരണം ചെയ്തതായി അറിയുന്നു.ചെളി നിറച്ച തൊട്ടി വലിച്ചു കയറ്റുന്നതിനിടെ കൈവിട്ട്കിണറ്റിലുള്ളില്‍ നില്‍ക്കുകയായിരുന്ന സജീവിന്റെ തലയില്‍ പതിയ്ക്കുകയായിരുന്നു.