മുക്കം: വാഹനത്തില്‍ കടത്തുകയായിരുന്ന കഞ്ചാവ് മുക്കത്തുവച്ച് പിടികൂടി. മുക്കം പി.സി ജങ്ഷനില്‍ വച്ചാണ് 250 ഗ്രാം കഞ്ചാവുമായി രണ്ട് വിദ്യാര്‍ഥികളെ കുന്ദമംഗലം എക്‌സൈസ് സംഘം പിടികൂടിയത്. കാരശ്ശേരി കറുത്തപറമ്പ് എള്ളങ്ങല്‍ അഭിജിത്ത് (19), കക്കാട് തെക്കേ തൊടികയില്‍ ഫൈസല്‍ (19) എന്നിവരാണ് പിടിയിലായത്.
എക്‌സൈസ് ഇന്‍സ്‌പെക്ടര്‍ പി. സജിത്ത് കുമാറിന്റെ നേതൃത്വത്തിലാണ് ഇവരെ പിടികൂടിയത്. സംഘത്തിലുണ്ടായിരുന്ന മറ്റു രണ്ടുപേര്‍ ഓടിരക്ഷപ്പെട്ടു. മലയോര മേഖല കേന്ദ്രീകരിച്ച് വന്‍ മദ്യ, മയക്കുമരുന്ന് മാഫിയ പ്രവര്‍ത്തിക്കുന്നതായി വിവരം ലഭിച്ചതിന്റെ അടിസ്ഥാനത്തില്‍ കഴിഞ്ഞദിവസങ്ങളില്‍ നിരീക്ഷണം ശക്തമാക്കിയിരുന്നു.
ഇവര്‍ സഞ്ചരിച്ച ബൈക്കും കസ്റ്റഡിയിലെടുത്തിട്ടുണ്ട്. പി.കെ ഹരീഷ്, പ്രിയരന്‍ജന്‍ ദാസ്, മുഹമ്മദ് ഇര്‍ഷാദ്, സുരേഷ് എന്നിവരും പൊലിസ് സംഘത്തിലുണ്ടായിരുന്നു.