പയ്യോളി: നഗരസഭാ അധികൃതര്‍ മത്സ്യ മാര്‍ക്കറ്റിനോടും തൊഴിലാളികളോടും തികഞ്ഞ  അവഗണനയാണ് കാണിക്കുന്നതെന്ന് മത്സ്യമാര്‍ക്കറ്റ്  തൊഴിലാളി  കോഡിനേഷന്‍ കമ്മിറ്റി ഭാരവാഹികള്‍ ആരോപിച്ചു.
പുതിയ മാര്‍ക്കറ്റ് ഉദ്ഘാടനം ചെയ്തുവെന്നല്ലാതെ ഇവിടേക്കുള്ള മറ്റു സൗകര്യങ്ങള്‍ എത്തിക്കാന്‍ അധികൃതര്‍ തയാറായിട്ടില്ല. തീരദേശ വികസന കോര്‍പറേഷന്‍ ഒരു കോടി, 15 ലക്ഷം രൂപ  ചെലവില്‍ പൂര്‍ത്തിയാക്കിയ ആധുനിക മത്സ്യമാര്‍ക്കറ്റ് കെട്ടിടത്തിന്റെ വിള്ളലുകളും മറ്റ് അപാകതകളും കോഡിനേഷന്‍ കമ്മിറ്റി അന്നുതന്നെ നഗരസഭയുടെ ശ്രദ്ധയില്‍പ്പെടുത്തിയിരുന്നു.
 അതെല്ലാം പരിഹരിക്കാന്‍ തീരദേശ വികസന കോര്‍പറേഷന്റെ ഉദ്യോഗസ്ഥര്‍ എത്തി ബോധ്യപ്പെട്ട ശേഷം അപാകതകള്‍  പരിഹരിക്കുമെന്ന് ഉറപ്പുനല്‍കിയെങ്കിലും അതും പാലിക്കാന്‍ ഇതുവരെ  തയാറായിട്ടില്ല. മത്സ്യമാര്‍ക്കറ്റിനെ ആശ്രയിച്ചു കഴിയുന്ന നാല്‍പതോളം കുടുംബങ്ങളുടെ സ്ഥിതി ദയനീയമാണെന്നും ഭാരവാഹികളായ ടി.പി സിദ്ദീഖ്, കെ. കുഞ്ഞിക്കണ്ണന്‍, ടി.പി ലത്തീഫ്, കെ.വി കരീം പറഞ്ഞു.