പൂനെ: സണ്‍റൈസേഴ്‌സ് ഹൈദരാബാദിനെതിരേ ചെന്നൈ സൂപ്പര്‍ കിങ്‌സിന് ജയം. സണ്‍റൈസേഴ്‌സ് ഹൈദരാബാദ് നാലു വിക്കറ്റ് നഷ്ടത്തില്‍ 179 റണ്‍സെടുത്തു. മറുപടി ബാറ്റിങ്ങിനിറങ്ങിയെ ചെന്നൈ ആറു പന്ത് ബാക്കി നില്‍ക്കെ രണ്ട് വിക്കറ്റ് നഷ്ടത്തില്‍ 180 റണ്‍സെടുത്തു.

ടോസ് നേടി ബാറ്റിങ്ങിനിറങ്ങിയ ഹൈദരാബാദിന്റെ മൂന്ന് താരങ്ങള്‍ രണ്ടക്കം കാണാതെ കളംവിട്ടു. 49 പന്തില്‍ മൂന്ന് സിക്‌സറും 10 ഫോറും നേടി ശിഖര്‍ ധവാന്‍ 79 റണ്‍സ് നേടി. ഹര്‍ബജന്‍ സിങ് ക്യാച്ച് ചെയ്താണ് ധവാനെ പുറത്താക്കിയത്. ഒമ്പത് പന്ത് നേരിട്ട അലക്‌സ് ഹല്‍സ് രണ്ട് റണ്‍സ് മാത്രമാണ് സംഭാവന ചെയ്തത്. 39 പന്ത് നേരിട്ട വില്യംസണ്‍ രണ്ട് സിക്‌സറും അഞ്ചും ഫോറും നേടി 51 റണ്‍സെടുത്തു. ആറു പന്തില്‍നിന്ന് അഞ്ച് റണ്‍സ് മാത്രമായിരുന്നു മനീഷ് പാണ്ഡെയുടെ സമ്പാദ്യം.

11 പന്തില്‍നിന്ന് ഹൂഡ 21 റണ്‍സ് നേടി പുറത്താകാതെ നിന്നു. ആറു പന്തില്‍നിന്ന് ഷാക്കിബുല്‍ ഹസന്‍ എട്ട് റണ്‍സ് നേടി. നാല് ഓവര്‍ എറിഞ്ഞ ശര്‍ദില്‍ താക്കൂര്‍ 32 റണ്‍സ് വഴങ്ങി രണ്ട് വിക്കറ്റ് സ്വന്തമാക്കി. നാല് ഓവര്‍ എറിഞ്ഞ ദീപക് ചാഹറ് 16 റണ്‍സ് വിട്ടുകൊടുത്ത് ഒരു വിക്കറ്റ് നേടി. ബ്രാവോ നാല് ഓവറില്‍ 39 റണ്‍സ് വഴങ്ങി ഒരു വിക്കറ്റെടുത്തു. രണ്ട് ഓവര്‍ എറിഞ്ഞ ജഡേജക്ക് വിക്കറ്റൊന്നും നേടാനായില്ല . വാട്‌സന് രണ്ട് ഓവറില്‍ 15 റണ്‍സ് വഴങ്ങേണ്ടി വന്നു. അമ്പാട്ടി റായിഡുവിന്റെ മികച്ച ബാറ്റിങ്ങാണ് ചെന്നൈക്ക് ജയം സമ്മാനിച്ചത്. 35 പന്തില്‍ 57 റണ്‍സെടുത്ത ഷെയ്ന്‍ വാട്‌സനും ചെന്നൈ നിരയില്‍ മികച്ചു നിന്നു. 62 പന്തിലായിരുന്നു അമ്പാട്ടി റായിഡുവിന്റെ സെഞ്ചുറി നേട്ടം. സുരേഷ് റെയ്‌നക്ക് മൂന്ന് പന്തില്‍ രണ്ട് റണ്‍സ് മാത്രമേ എടുക്കാനായുള്ളു. 14 പന്തില്‍നിന്ന് 20 റണ്‍സ് നേടി ധോണി പുറത്താകാതെ നിന്നു.

ധോണി റായിഡു കൂട്ടുകെട്ടാണ് ചെന്നൈയെ വിജയത്തിലെത്തിച്ചത്. ഹൈദരാബാദിന്റെ ബൗളര്‍മാരെയെല്ലാം ചെന്നൈ ബാറ്റിങ് നിര കണക്കിന് സിക്ഷിച്ചു. സിദ്ധാര്‍ഥ് കൗളിന്റെ മൂന്ന് ഓവറില്‍ 40 റണ്‍സാണ് ചെന്നൈ താരങ്ങള്‍ അടിച്ചു കൂട്ടിയത്. ഷാക്കിബുല്‍ ഹസന്റെ നാല് ഓവറില്‍ 41 റണ്‍സും ചെന്നൈ നേടി. സന്ദീപ് ശര്‍മക്ക് മാത്രമാണ് വിക്കറ്റ് നേടാനായത്. ഭുവനേശ്വര്‍ കുമാറിന് നാല് ഓവറില്‍ 38 വഴങ്ങേണ്ടി വന്നു. റാഷിദ് ഖാന്റെ നാല് ഓവറില്‍ 25 റണ്‍സെടുത്തു ചെന്നൈ.