കല്‍പ്പറ്റ: ഇത്ര മനോഹരമായ ഒരു നാട്ടില്‍ ജനിച്ച വയനാട്ടുകാരായ നിങ്ങള്‍ ഭാഗ്യവാന്‍മാരാണെന്ന് ഇന്ത്യന്‍ ക്രിക്കറ്റ് താരം ഇര്‍ഫാന്‍ പഠാന്‍. കല്‍പ്പറ്റയില്‍ പുതുതായി ആരംഭിച്ച അഡ്രസ് മെന്‍സ് അപ്പാരലിന്റെ ഉദ്ഘാടനത്തിനെത്തിയതായിരുന്നു ഇന്ത്യയുടെ കംപ്ലീറ്റ് ഓള്‍റൗണ്ടര്‍. 'നമസ്‌കാരം കല്‍പ്പറ്റ' എന്നു തുടങ്ങിയാണ് വേദിയില്‍ ഇര്‍ഫാന്‍ പഠാന്‍ സംസാരമാരംഭിച്ചത്.
ബറോഡക്കാരനായ തനിക്ക് വയനാട്ടിലെ കാലാവസ്ഥ പുതിയ ഒരു അനുഭൂതിയാണ് സമ്മാനിച്ചത്. ഇത്രയും മനോഹരമായ ഈനാട്ടില്‍ ജനിച്ച് വളര്‍ന്ന നിങ്ങള്‍ അതുകൊണ്ടുതന്നെ വളരെ ഭാഗ്യവാന്‍മാരാണ്. കാരണം ഈ മനോഹാരിത നിങ്ങള്‍ക്ക് എന്നും ആസ്വദിക്കാമല്ലോ. എന്നെ ഇഷ്ടപ്പെടുന്ന ഇത്രയധികം ആളുകള്‍ ഇവിടെയുണ്ടെന്നറിഞ്ഞതില്‍ സന്തോഷം. നിങ്ങളുടെ സ്‌നേഹത്തിന് മുന്നില്‍ എനിക്ക് മറ്റ് വാക്കുകളില്ല. ഇനിയും ഞാന്‍ ഈ പ്രകൃതിരമണീയമായ നാട്ടിലേക്ക് വരുമെന്നും പറഞ്ഞാണ് ഇര്‍ഫാന്‍ പഠാനെന്ന ഇന്ത്യന്‍ ക്രിക്കറ്റിലെ സൗന്ദര്യം സംസാരമവസാനിപ്പിച്ചത്.