തളിപ്പറമ്പ്: തളിപ്പറമ്പ് കരീബിയന്‍സ് ഫുട്‌ബോള്‍ ഫെസ്റ്റിന്റെ ഉദ്ഘാടന മത്സരത്തില്‍ തളിപ്പറമ്പ് എഫ്.സിയെ രണ്ടിനെതിരെ മൂന്ന് ഗോളുകള്‍ക്ക് എഫ്.സി കൊണ്ടോട്ടി പരാജയപ്പെടുത്തി. തളിപ്പറമ്പ് ഉണ്ടപ്പറമ്പ ഗോനെക്‌സ സ്‌റ്റേഡിയത്തില്‍ തിങ്ങിനിറഞ്ഞ ഫുട്‌ബോള്‍ ആരാധകരെ ആവേശംകൊള്ളിച്ച് ഗ്രൗണ്ട് നിറഞ്ഞ് കളിച്ചത് തളിപ്പറമ്പ് എഫ്.സിയായിരുന്നു. തളിപ്പറമ്പ് എഫ്.സി താരം കരീമിന്റെ പിഴവിലാണ് ടൂര്‍ണമെന്റിലെ ആദ്യഗോള്‍ പിറന്നത്. എഫ്.സി കൊണ്ടോട്ടിക്കുവേണ്ടി ഐവറി കോസ്റ്റ് താരം നാനിയിലൂടെ രണ്ടാം ഗോളും ഐവറികോസ്റ്റിന്റെ തന്നെ ഫ്രെഡിയിലൂടെ മൂന്നാം ഗോളും നേടി. എഫ്.സി തളിപ്പറമ്പിനു വേണ്ടി ബാക്കിയും ആല്‍ബിനും ഓരോ ഗോള്‍ വീതം നേടി.
ടൂര്‍ണമെന്റിന്റെ മുഖ്യ സ്‌പോണ്‍സറായ ഗോനെക്‌സ കമ്പനി എം.ഡി എം.കെ ഷൈലാജ് ഉദ്ഘാടനം നിര്‍വഹിച്ചു. തളിപ്പറമ്പ നഗരസഭാ ചെയര്‍മാന്‍ അള്ളാംകുളം മഹമൂദ് മുഖ്യാതിഥിയായി.
കെ.എഫ് എമേഖലാ പ്രസിഡന്റ് അഷ്‌റഫ് ഇളയടത്ത് ടൂര്‍ണമെന്റ് പതാക ഉയര്‍ത്തി. സിദ്ധിഖ് സൂപ്പര്‍ കരീബിയന്‍സ് ക്ലബ്ബിന്റെ പതാകയും  ഉയര്‍ത്തി.  ഇന്നു നടക്കുന്ന മത്സരത്തില്‍ ബ്ലാക്ക് ആന്റ് വൈറ്റ് കോഴിക്കോടും എഫ്.സി കൊണ്ടോട്ടിയും ഏറ്റുമുട്ടും.