കൊച്ചി: കര്‍ദിനാള്‍ മാര്‍ ജോര്‍ജ് ആലഞ്ചേരി കാര്‍ഡിനല്‍ നഗറിലെ വീടും സ്ഥലവും റീ രജിസ്റ്റര്‍ ചെയ്ത് നല്‍കിയെന്ന ആരോപണം കെട്ടിച്ചമച്ചതാണെന്ന് സ്ഥല ഉടമ ജെന്‍സണ്‍ ജയിംസ്. തന്റെ വീട്ടുപേരും കര്‍ദിനാളിന്റെ വീട്ടുപേരും ഒന്നാണ് എന്നതല്ലാതെ കുടുംബങ്ങള്‍ തമ്മില്‍ ഒരു ബന്ധമിവുമില്ലെന്നും ജെന്‍സണ്‍ പറഞ്ഞു.

കര്‍ദിനാളിനെയും തങ്ങളെയും സാമൂഹിക മാധ്യമങ്ങളിലൂടെ അപമാനിച്ച ഷൈജു ആന്റണിക്കെതിരേ നിയമനടപടി സ്വീകരിക്കും. എറണാകുളം അങ്കമാലി അതിരൂപത 1969ല്‍ കര്‍ദിനാള്‍ മാര്‍ ജോസഫ് പാറേക്കാട്ടിലിന്റെ കാലത്ത് നിര്‍ധനര്‍ക്കായി തൃക്കാക്കരയില്‍ വീടുവച്ച് കൊടുക്കുന്ന പദ്ധതിയില്‍ തന്റെ പിതൃസഹോദരന്‍ ഫിലിപ്പോസ് ജോര്‍ജിനും വീട് ലഭിച്ചിരുന്നു. അങ്കമാലി അതിരൂപതയുടെ വെല്‍ഫെയര്‍ സൊസൈറ്റിയാണ് പദ്ധതി നടത്തിയിരുന്നത്. അന്ന് സാമ്പത്തിക ബുദ്ധിമുട്ട് മൂലം മുഴുവന്‍ തുകയും നല്‍കാനായില്ല. 5000 രൂപയില്‍ 1290രൂപ കുടുംബം നല്‍കാനുണ്ടായിരുന്നു. അതിനിടയില്‍ സാമ്പത്തികമായി പിന്നാക്കമായ തന്റെ കുടുംബത്തിന് ഭൂമി പിതൃസഹോദരന്റെ കുടുംബം നല്‍കുകയായിരുന്നു.
2016ലാണ് ഭൂമിയുടെ മുഴുവന്‍ തുക നല്‍കിയിട്ടില്ലെന്നും രജിസ്‌ട്രേഷന്‍ നടപടി പൂര്‍ത്തിയാക്കിയിട്ടില്ലെന്നുമുള്ള വിവരം ശ്രദ്ധയില്‍ പെടുന്നത്. തുടര്‍ന്ന് കുടുംബം വിഷയം ഇടവക വികാരിയായ ഫാ.ജോസ് വൈലിക്കോടത്ത് മുഖേന അരമനയുടെ ശ്രദ്ധയില്‍ പെടുത്തി. നല്‍കാനുണ്ടായിരുന്ന തുക സൊസൈറ്റി ഓഫിസില്‍ അടച്ച് അരമനയുടെ നിര്‍ദേശപ്രകാരം അന്നത്തെ ഭൂമി വിലയുടെ സ്റ്റാമ്പ് ഡ്യൂട്ടി അടച്ച് വസ്തു എഴുതി വാങ്ങുകയാണുണ്ടായതെന്നും ജെന്‍സണ്‍ വാര്‍ത്താസമ്മേളനത്തില്‍ പറഞ്ഞു. അഡ്വ. ഡെല്‍ബി ഇമ്മാനുവല്‍, അഡ്വ. മെല്‍വിന്‍ മാത്യു, ടോജോ ചിറ്റേറ്റുകുളം എന്നിവരും പങ്കെടുത്തു.