തിരുവനന്തപുരം : എഡിജിപി എം ആര്‍ അജിത്ത് കുമാറിനെതിരായ ഡിജിപിയുടെ റിപ്പോര്‍ട്ട് നാളെ സര്‍ക്കാരിന് സമര്‍പ്പിക്കും. ഡിജിപിയുടെ റിപ്പോര്‍ട്ട് ഇന്ന് സമര്‍പ്പിക്കുമെന്നാണ് അറിയിച്ചിരുന്നത്. എന്നാല്‍ റിപ്പോര്‍ട്ട് അന്തിമമാക്കാന്‍ സമയം എടുത്തതാണ് വൈകാന്‍ കാരണമെന്നാണ് വിവരം. ആര്‍ എസ് എസ് നേതാക്കളുമായി നടത്തിയ കൂടിക്കാഴ്ച്ചയില്‍ എഡിജിപിയുടെ വിശദീകരണം തള്ളിയാണ് റിപ്പോര്‍ട്ടെന്ന വിവരം നേരത്തെ തന്നെ പുറത്ത് വന്നിരുന്നു.

രണ്ട് ഉന്നത ആര്‍എസ് എസ് നേതാക്കളെ കണ്ടതിലെ എഡിജിപിയുടെ വിശദീകരണം തൃപ്തികരമല്ലെന്നാണ് ഡിജിപിയുടെ നിലപാട്. എന്നാല്‍ അന്‍വര്‍ ഉന്നയിച്ച മാമി തിരോധാനമടക്കമുള്ള കേസുകളില്‍ അജിതിന് വീഴ്ചയുണ്ടായെന്ന വിലയിരുത്തല്‍ റിപ്പോര്‍ട്ടിലുണ്ടാകില്ലെന്നാണ് സൂചന. ഇന്നലെ നടന്ന മന്ത്രിസഭാ ഉപസമിതിയോഗത്തിലും അജിത്തിനെ മാറ്റാതെ പറ്റില്ലെന്ന നിലപാടാണ് സിപിഐ സ്വീകരിച്ചത്.

തിങ്കളാഴ്ച മുതല്‍ വിവാദ വിഷയങ്ങള്‍ സഭയിലേക്കെത്തും, നടപടി അതിന് മുമ്പ് വേണമെന്ന നിലപാടിലാണ് സിപിഐ. മാറ്റാന്‍ ഒരുപാട് അവസരമുണ്ടായിട്ടും എഡിജിപിക്ക് പിന്തുണ നല്‍കിയ മുഖ്യമന്ത്രി ഡിജിപിയുടെ റിപ്പോര്‍ട്ടില്‍ നടപടിയെടുക്കുമെന്ന പ്രതീക്ഷയിലാണ് സിപിഐ. അപ്പോഴും മാറ്റം ക്രമസമാധാനചുമതലയില്‍ നിന്ന് മാത്രമാകും, സസ്‌പെന്‍ഷന്‍ അടക്കമുള്ള അച്ചടക്ക നടപടികള്‍ക്കുള്ള സാധ്യത വളരെ കുറവാണ്.

The Kerala DGP's report against ADGP M R Ajith Kumar is set to be submitted to the government tomorrow, amidst ongoing controversy surrounding the senior police officer.