ലഖ്നൗ: ഉത്തര്‍പ്രദേശിലെ അമേഠിയില്‍ അധ്യാപകനും ഭാര്യയും രണ്ട് പെണ്‍മക്കളും കൊല്ലപ്പെട്ട സംഭവത്തില്‍ പ്രതിയുടെ മൊഴി പുറത്ത്. കൊല്ലപ്പെട്ട യുവതിയുമായി തനിക്ക് ഒന്നര വര്‍ഷമായി ബന്ധമുണ്ടായിരുന്നുവെന്നും അത് വഷളായതോടെയാണ് കൊലപാതകം നടത്തിയതെന്നുമാണ് പ്രതി മൊഴി നല്‍കിയിരിക്കുന്നത്. 

വ്യാഴാഴ്ചയാണ് ചന്ദന്‍ വര്‍മയടക്കം ആയുധധാരികളായ സംഘം അധ്യാപകനായ സുനില്‍(35), ഭാര്യ പൂനം(32), മകള്‍ ദൃഷ്ടി(6), ഒരു വയസ്സുള്ള മറ്റൊരു മകള്‍ എന്നിവരെ വീട്ടിലെത്തി വെടിവെച്ച് കൊന്നത്. 

വെള്ളിയാഴ്ച്ച ഉച്ചയോടെ നോയിഡയ്ക്ക് സമീപമുള്ള ടോള്‍ പ്ലാസയില്‍ നിന്നാണ് പ്രതിയായ ചന്ദന്‍ വര്‍മയെ പൊലിസ് അറസ്റ്റ് ചെയ്തത്. തുടര്‍ന്ന് നടത്തിയ തെളിവെടുപ്പില്‍ കൊലപാതകത്തിന് ഉപയോഗിച്ച പിസ്റ്റളും ഇയാള്‍ സഞ്ചരിച്ച ബൈക്കും പൊലിസ് കണ്ടെടുത്തു. 

ഇതിനിടെ പൊലിസ് കസ്റ്റഡിയില്‍ നിന്ന് രക്ഷപ്പെടാന്‍ ശ്രമിച്ച ചന്ദന്‍ വര്‍മയെ പൊലിസ് കാലിന് വെടിവെച്ച് കീഴ്‌പെടുത്തി. പൊലിസ് ഉദ്യോഗസ്ഥന്റെ തോക്ക് തട്ടിയെടുത്ത് രക്ഷപ്പെടാന്‍ ശ്രമിക്കവെയാണ് പൊലിസ് ഇയാളുടെ കാലിന് വെടിവെച്ചത്. 

ഭാര്യയെ ശല്യം ചെയ്തുവെന്ന് കാണിച്ച് സുനില്‍ ഓഗസ്റ്റ് 18ന് പൊലീസില്‍ പരാതി നല്‍കിയിരുന്നു. ഇതില്‍ കേസെടുത്ത പൊലീസ് ചന്ദന്‍ വര്‍മ അറസ്റ്റ് ചെയ്ത് ജാമ്യത്തില്‍ വിടുകയായിരുന്നു. തുടര്‍ന്ന് ഇയാള്‍ നിരന്തരം ഭീഷണിമുഴക്കുന്നതായി സുനില്‍ പൊലീസോട് പറഞ്ഞിരുന്നു.