കൊണ്ടോട്ടി: സംസ്ഥാന ഹജ്ജ് നറുക്കെടുപ്പും ഹജ്ജ് കമ്മിറ്റി യോഗവും നാളെ കരിപ്പൂര്‍ ഹജ്ജ്ഹൗസില്‍ വച്ച് നടക്കും. നറുക്കെടുപ്പിനുളള മുഴുവന്‍ സജ്ജീകരണങ്ങളും പൂര്‍ത്തിയായി. തീര്‍ഥാടനത്തെക്കുറിച്ച് ചര്‍ച്ച ചെയ്യുന്നതിന് രാവിലെ 9ന് സംസ്ഥാന ഹജ്ജ് കമ്മിറ്റി യോഗം ചേരും. തെരഞ്ഞെടുപ്പ് പെരുമാറ്റ ചട്ടം നിലവിലുളളതിനാല്‍ വകുപ്പ് മന്ത്രിയടക്കം ചടങ്ങിനെത്തുന്നില്ല.ഞായറാഴ്ച രാവിലെ 11നാണ് ഹജ്ജ് നറുക്കെടുപ്പ് നടത്തുക. ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ്കുഞ്ഞി മൗലവി, ഹജ്ജ് സെക്രട്ടറിയും മലപ്പുറം ജില്ലാകലക്ടറുമായ അമിത് മീണ തുടങ്ങിയവര്‍ സംബന്ധിക്കും.