ലഖ്‌നൗ: ഉത്തര്‍പ്രദേശില്‍ വര്‍ഗീയ കലാപം ആളിക്കത്തിക്കാന്‍ ബി.ജെ.പി-സംഘപരിവാര്‍ ശ്രമം.
സംസ്ഥാന തെരഞ്ഞെടുപ്പില്‍ മൂന്നില്‍ രണ്ട് ഭൂരിപക്ഷം നേടിയതിന്റെ വിജയാഹ്ലാദത്തിനിടയില്‍ ബുധനാഴ്ച രാവിലെ ബുലന്ദ്ഷഹര്‍ ജില്ലയിലെ ഒരു ഗ്രാമത്തിലെ മുസ്്‌ലിം പള്ളിക്കുമുകളില്‍ ബി.ജെ.പി പ്രവര്‍ത്തകര്‍ തങ്ങളുടെ കൊടി നാട്ടിയാണ് പ്രകോപനത്തിന് ശ്രമം നടത്തിയത്.
ഇതേതുടര്‍ന്ന് ഗ്രാമത്തില്‍ സ്‌ഫോടനാത്മക അന്തരീക്ഷമാണെന്നും അക്രമം പടരാതിരിക്കാന്‍ സുരക്ഷ ശക്തമാക്കിയതായും പൊലിസ് അറിയിച്ചു.
നെറ്റിയില്‍ ചുവന്ന കുറിവരച്ച് എത്തിയ ഒരു സംഘമാണ് പള്ളിയുടെ മിനാരത്തില്‍ രാവിലെ 9.30ഓടെ കൊടി ഉയര്‍ത്തിയതെന്ന് ഗ്രാമവാസിയായ മുഹ്‌സിന്‍ അഹമ്മദ് പറഞ്ഞു.
സംഭവത്തെത്തുടര്‍ന്ന് മുസ്‌ലിം-ഹിന്ദു മതസ്ഥര്‍ പ്രദേശത്ത് സംഘടിച്ചിട്ടുണ്ട്. മുസ്്‌ലിം ജനവിഭാഗങ്ങള്‍ക്കിടയില്‍ ഭയപ്പാടിന് ഇടയാക്കിയ സംഭവമാണ് ഇതെന്ന് ഗ്രാമീണര്‍ പറയുന്നു.അതേസമയം ഇത്തരമൊരു നീക്കം തങ്ങള്‍ നടത്തിയിട്ടില്ലെന്ന വാദവുമായി ബി.ജെ.പി നേതാക്കള്‍ രംഗത്തെത്തിയിട്ടുണ്ട്. ഇതിനുപിന്നില്‍ സാമൂഹിക ദ്രോഹികളാണെന്നും നേതാക്കള്‍ പറഞ്ഞു.