മേപ്പയ്യൂര്‍: നരക്കോട് വടേകൊടക്കാട്ട് താഴ സര്‍ഗ ഭാസ്‌കരന്റെ വീട്ടിലും തൊട്ടുപിന്നിലുള്ള ഫനാര്‍ ബഷീറിന്റെ വീട്ടിലും ഇന്നലെ പുലര്‍ച്ചെ മോഷണം. ഭാസ്‌കരന്റെ വീട്ടില്‍ നിന്ന് 1,14,000 രൂപയും ഒരു പവന്‍ സ്വര്‍ണവും ബഷീറിന്റെ വീട്ടില്‍ നിന്ന് മൂന്നര പവന്‍ സ്വര്‍ണാഭരണവും 10,000 രൂപയും മോഷ്ടാക്കള്‍ കവര്‍ന്നു. വീടിന്റെ മുന്‍വശത്തെ വാതിലിന്റെ പൂട്ട് തകര്‍ത്താണ് രണ്ടു വീടുകളിലും മോഷ്ടാക്കള്‍ അകത്തു കയറിയത്.
ഇരു വീടുകളും പൂട്ടിയിട്ടതായിരുന്നു. ഭാസ്‌കരനും കുടുംബവും രാമേശ്വരത്തും ബഷീര്‍ വിദേശത്തേക്കു പോയിരുന്നതിനാല്‍ ഭാര്യ തറവാട് വീട്ടിലുമായിരുന്നു.
മേപ്പയൂര്‍ എസ്.ഐ യൂസുഫ് നടക്കുത്തറേമ്മല്‍, അഡിഷണല്‍ എസ്.ഐ ബാബുരാജ് എന്നിവരുടെ നേതൃത്വത്തിലുള്ള പൊലിസ് സംഘം സ്ഥലത്തെത്തി കേസെടുത്ത് അന്വേഷണമാരംഭിച്ചു.
കോഴിക്കോട് റൂറല്‍ ഫിംഗര്‍ പ്രിന്റ് ബ്യൂറോയിലെ വിദഗ്ധന്‍ കെ. രഞ്ജിത്തിന്റെ നേതൃത്വത്തിലുള്ള സംഘവും പയ്യോളി ഡോഗ് സ്‌കോഡിലെ പി.ടി പ്രദീഷ്, കെ. മണികണ്ടന്‍ എന്നിവരുടെ സംഘവും സ്ഥലത്തെത്തി പരിശോധന നടത്തി.
രണ്ടു മാസങ്ങള്‍ക്ക് മുന്‍പ് മേപ്പയൂര്‍ മഞ്ഞക്കുളം പെട്രോള്‍ പമ്പിനു സമീപത്തുള്ള അടച്ചിട്ട വീട്ടില്‍ മോഷണം നടന്നിരുന്നു.