മലപ്പുറം: പാര്‍ലിമെന്റ് മണ്ഡലം യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടിയുടെ തെരഞ്ഞെടുപ്പ് പ്രചരണ രംഗത്ത് വേറിട്ട മാതൃക സൃഷ്ടിച്ച് സ്ഥാനാര്‍ഥിയുടെ പുതുതലമുറയുമായുള്ള സംവാദ ചടങ്ങ് 'ടീന്‍സ് ടോക്' നാളെ മലപ്പുറം കിഴക്കെതലയില്‍ യു.ഡി.എഫ്. കണ്‍വന്‍ഷന്‍ വേദിയില്‍ നടക്കും. സ്ഥാനാര്‍ഥി നോമിനേഷന്‍ സമര്‍പ്പിച്ചതിന് ശേഷം രാവിലെ 11 നാണ് ചടങ്ങ് സംഘടിപ്പിച്ചിട്ടുള്ളത്. മലപ്പുറം മണ്ഡലം മുസ്‌ലിം യൂത്ത് ലീഗ് കമ്മിറ്റിയുടെ നേതൃത്വത്തില്‍ സംഘടിപ്പിക്കുന്ന പരിപാടിയില്‍ യു.ഡി.എഫിന്റെ സംസ്ഥാന, ജില്ലാ നേതാക്കള്‍ പങ്കെടുക്കും.
    ദേശീയ സംസ്ഥാന രാഷ്ട്രീയം, മതേതരത്വ ചേരികളുടെ അനിവാര്യത, ഫാസിസ്റ്റ് രാഷ്ട്രീയത്തിനെതിരെയുള്ള ഒരുമിച്ചുള്ള പോരാട്ടം, വികസന സങ്കല്‍പങ്ങളും കാഴ്ചപ്പാടുകളും തുടങ്ങിയ വിഷയങ്ങളില്‍ സ്ഥാനാര്‍ത്ഥിയുമായി യുവ തലമുറയിലെ വോട്ടര്‍മാരുമായി നേരിട്ട് സംവാദിക്കുന്നതാണ് ടീന്‍സ് ടോക്. യുവാക്കള്‍, വിവിധ കോളേജുകളിലെ വിദ്യാര്‍ഥികള്‍, കന്നി വോട്ടര്‍മാര്‍ എന്നിവര്‍ ഇതില്‍ പങ്കാളികളാവുമെന്ന് മണ്ഡലം മുസ്‌ലിം യൂത്ത് ലീഗ് പ്രസിഡന്റ് ബാവ പുല്‍പറ്റ, ജനറല്‍ സെക്രട്ടറി കെ.എന്‍.ഷാനവാസ്, ട്രഷറര്‍ അഷ്‌റഫ് പാറച്ചോടന്‍ എന്നിവര്‍ അറിയിച്ചു.