തൃശൂര്‍: ഭിന്നലിംഗക്കാരായ മൂന്ന് പേരെ അര്‍ധരാത്രിയില്‍ കെ.എസ്.ആര്‍.ടി.സി ബസ് സ്റ്റാന്റിനടുത്തു വച്ച് ഈസ്റ്റ് പൊലിസ് ക്രൂരമായി മര്‍ദിച്ചതായി പരാതി. ഭിന്നലിംഗക്കാരായ അലീന, ദീപ്തി, രാഗരഞ്ജിനി എന്നിവര്‍ക്കാണ് പൊലിസ് മര്‍ദനത്തില്‍ ഗുരുതരമായി പരുക്കേറ്റത്. ബംഗളൂരുവിലേയ്ക്ക് പോകാനായി വെള്ളിയാഴ്ച രാത്രി 11.30ന് ശക്തന്‍ സ്റ്റാന്റിലെത്തിയതായിരുന്നു ഇവര്‍. സ്റ്റാന്റിന് മുന്നിലുള്ള ഹോട്ടലില്‍ നിന്ന് ഭക്ഷണം കഴിച്ച് ഇറങ്ങിയ ഉടന്‍ പൊലിസ് ജീപ്പിലെത്തിയ എസ്.ഐയും രണ്ട് സി.പി.ഒമാരും അടങ്ങുന്ന സംഘം ചൂരല്‍കൊണ്ട് അടിക്കുകയായിരുന്നു.
തുടയും നെഞ്ചും കൈയും അടിയേറ്റ് പൊട്ടിയിട്ടുണ്ട്. ഈയിടെ ലിംഗമാറ്റ ശസ്ത്രക്രിയ നടത്തിയവരും കാലിന് അസുഖമുള്ളവരുമുള്‍പ്പെടെയുള്ള മൂന്ന് പേര്‍ക്ക് നേരെയാണ് പൊലിസ് ആക്രമണം. യാതൊരു പ്രകോപനവും ഇല്ലാതെയാണ് പൊലിസ് നടപടിയെന്ന് ഇവര്‍ പറഞ്ഞു. അവശരായ ഇവര്‍ രാത്രി തന്നെ ജില്ലാ ആശുപത്രിയില്‍ എത്തിയെങ്കിലും ഡ്യൂട്ടി ഡോക്ടര്‍ ചികിത്സിക്കാന്‍ തയാറായില്ലെന്നും പരാതിയുണ്ട്. അഡ്മിറ്റ് ചെയ്യണമെന്നാവശ്യപ്പെട്ടെങ്കിലും സമ്മതിക്കാത്തതിനെ തുടര്‍ന്ന് മൂവരും നിര്‍ബന്ധപൂര്‍വം ആശുപത്രിയില്‍ തന്നെ ഇരിക്കുകയായിരുന്നു. ആദ്യം ഒരു ഡോക്ടര്‍ വന്ന് പരിശോധിച്ചെങ്കിലും തൊട്ടുപിന്നാലെ മറ്റൊരു ഡോക്ടര്‍ വന്ന് ഇവരെ ഇറക്കിവിടാന്‍ ശ്രമിക്കുകയായിരുന്നു. ഉടന്‍ ആശുപത്രിയില്‍ നിന്ന് പോകണമെന്ന് ഈ ഡോക്ടര്‍ ശാഠ്യം പിടിച്ചതായും പറയുന്നു. ദീപ്തി ഗുരുവായൂര്‍ സ്വദേശിനിയാണ്. രാഗരഞ്ജിനി കൊല്ലം സ്വദേശിനിയും അലീന മലപ്പുറത്തുകാരിയുമാണ്. വീടുമായി ബന്ധമില്ലാത്ത ഇവര്‍ തൃശൂരിലാണ് താമസിക്കുന്നത്.