കോട്ടയം: പള്‍സര്‍ സുനിക്ക് വ്യാജ തിരിച്ചറിയല്‍ കാര്‍ഡുപയോഗിച്ച് സിംകാര്‍ഡ് എടുത്തു നല്‍കിയ കേസിലെ മുഖ്യപ്രതി പിടിയില്‍. കോട്ടയം തിരുനക്കര ചിറയില്‍പാടത്ത് പുതിയാപറമ്പില്‍ കെ.ജി മാര്‍ട്ടിനെ(52)യാണ് ഇന്നലെ രാവിലെ കോട്ടയം വെസ്റ്റ് പൊലിസ് പിടികൂടിയത്.
കേസിലെ ഒന്നാം പ്രതിയാണ് മാര്‍ട്ടിന്‍. വ്യാജരേഖ ചമച്ചതിനും ഗൂഢാലോചനയ്ക്കുമാണ് കോട്ടയം വെസ്റ്റ് പൊലിസ് കേസെടുത്തത്.
ജില്ലാ പൊലിസ് ചീഫ് എന്‍ രാമചന്ദ്രന്റെ നിര്‍ദേശാനുസരണം ഡിവൈ.എസ്.പി ഗിരീഷ് പി സാരഥിയുടെ നേതൃത്വത്തിലായിരുന്നു അന്വേഷണം. കേസിലെ രണ്ടാം പ്രതി പാലാ ചെത്തിമറ്റം കാനാട്ട് മോന്‍സി സ്‌കറിയ (46), മൂന്നാം പ്രതി ആലപ്പുഴ സ്വദേശിനിയും എറണാകുളം ഇളകുളം ഉഷസില്‍ വാടകക്ക് താമസിക്കുന്നതുമായ ഷൈനി തോമസ് (35) എന്നിവരെ പൊലിസ് വെള്ളിയാഴ്ച അറസ്റ്റ് ചെയ്തിരുന്നു. ഇവരെ ഇന്നലെ റിമാന്‍ഡ് ചെയ്തു.
കോട്ടയം വെസ്റ്റ് പൊലിസ് രജിസ്റ്റര്‍ ചെയ്ത കേസിലാണ് പ്രതികള്‍ കുടുങ്ങിയത്. കോട്ടയം കാഞ്ഞിരം സ്വദേശി ദീപക് തിരുനക്കരയിലെ സ്വകാര്യ ആശുപത്രിക്ക് സമീപം മാര്‍ട്ടിന്റെ ഉടമസ്ഥതയിലുള്ള സ്‌റ്റെല്ല പ്ലെയിസ്‌മെന്റ് ജോബ് കണ്‍സള്‍ട്ടന്‍സിയില്‍ ആറു മാസം മുന്‍പ് നല്‍കിയ രേഖകള്‍ ഉപയോഗിച്ച് എടുത്ത സിംകാര്‍ഡാണ് സുനിയുടെ കൈവശമെത്തിയത്