ന്യൂഡല്‍ഹി: മുഖ്യമന്ത്രി പിണറായി വിജയന്‍ ഉള്‍പ്പെടെയുള്ളവര്‍ പ്രതിയായ ലാവ്‌ലിന്‍ അഴിമതിക്കേസ് പരിഗണിക്കുന്നത് സുപ്രിം കോടതി വീണ്ടും നീട്ടി.
പിണറായി അടക്കമുള്ള മൂന്നുപ്രതികളെ കുറ്റമുക്തരാക്കിയ ഹൈക്കോടതി വിധിക്കെതിരായി സി.ബി.ഐ നല്‍കിയ ഹരജിയാണ് ഈ വിഷയത്തില്‍ ജസ്റ്റിസുമാരായ എന്‍.വി രമണ, അബ്ദുല്‍ നസീര്‍ എന്നിവരടങ്ങിയ ബെഞ്ച് മുന്‍പാകെയുള്ള കേസ്. കേസിന് എന്തു അടിയന്തര സ്വഭാവമാണുള്ളതെന്നു ചോദിച്ചാണ് കോടതിയുടെ നടപടി.
അതേസമയം, കേസില്‍ കക്ഷിചേരാന്‍ അനുവദിക്കണമെന്നാവശ്യപ്പെട്ട് ക്രൈം നന്ദകുമാര്‍ ഹരജി നല്‍കി. സി.ബി.ഐ ഉള്‍പ്പടെ എല്ലാവരുടെയും നിലപാട് അറിഞ്ഞ ശേഷം നന്ദകുമാറിന്റെ ആവശ്യത്തില്‍ തീരുമാനം എടുക്കാമെന്ന് കോടതി അറിയിച്ചു.
കേസില്‍ വിചാരണ നേരിടണമെന്ന ഹൈക്കോടതി വിധിക്കെതിരേ പ്രതികളായ കസ്തൂരിരംഗ അയ്യര്‍, ആര്‍.ശിവദാസന്‍, കെ.ജി രാജശേഖരന്‍ എന്നിവര്‍ നല്‍കിയ ഹരജി പരിഗണിച്ച് ജനുവരി 11ന് സുപ്രിം കോടതി കേസിന്റെ വിചാരണ സ്റ്റേ ചെയ്തിരുന്നു. അന്തിമവിധി വരുന്നത് വരെയാണ് വിചാരണയ്ക്ക് സ്റ്റേയുള്ളത്.