മലപ്പുറം: തിയറ്റര്‍ പീഡനക്കേസില്‍ ചങ്ങരംകുളം എസ്.ഐ കെ.ജി ബേബിക്ക് ഗുരുതര വീഴ്ചപറ്റിയെന്ന് മലപ്പുറം എസ്.പിയുടെ റിപ്പോര്‍ട്ട്. അശ്രദ്ധയോടെയാണ് എസ്.ഐ പരാതി കൈകാര്യം ചെയ്തതെന്നും ഉടന്‍ തന്നെ പരിഗണിക്കാന്‍ എസ്.ഐ തയാറാകാതിരുന്നത് ഗുരുതര വീഴ്ചയാണെന്നും എസ്.പി ഡി.ജി.പിക്കു നല്‍കിയ റിപോര്‍ട്ടില്‍ പരാമര്‍ശിക്കുന്നുണ്ട്.
പരാതിയുള്ള കാര്യം എസ്.ഐ മേലുദ്യോഗസ്ഥരെ അറിയിക്കാതിരുന്നതും വീഴ്ചയാണ്. ഇതിനിടെ മറ്റൊരു കേസുമായി ബന്ധപ്പെട്ട് എസ്.ഐ ഡല്‍ഹിക്ക് പോയി. വീഴ്ച സംഭവിച്ചുവെന്ന് കണ്ടെത്തിയതിനെ തുടര്‍ന്ന് നേരത്തെ എസ്.ഐ കെ.ജി ബേബിയെ സസ്‌പെന്‍ഡ് ചെയ്യുകയും പോക്‌സോ പ്രകാരം കേസെടുക്കുകയും ചെയ്തിരുന്നു. കഴിഞ്ഞ മാസം 18നാണ് എടപ്പാളിലെ തിയറ്ററില്‍ ഒന്‍പതു വയസുകാരി പീഡനത്തിന് ഇരയായത്.