നേമം: നേമം പൊലിസ് സ്റ്റേഷന്‍ പരിധിയില്‍ ഒന്‍പത്കാരിയെ പീഡിപ്പിക്കാന്‍ ശ്രമിച്ച കേസിലെ പ്രതിയെ പൊലിസ് അറസ്റ്റ് ചെയ്തു. കല്ലിയൂര്‍ ഉടുമ്പന്നൂര്‍ പുതുവല്‍ വീട്ടില്‍ സാധുക്കുഞ്ഞ് (48) ആണ് പിടിയിലായത്. കഴിഞ്ഞ ഞായറാഴ്ച വൈകുന്നേരം നാലരയോടുകൂടി വീട്ടില്‍ മറ്റാരുമില്ലാത്ത സമയം പീഡിപ്പിക്കാന്‍ ശ്രമിച്ചു എന്ന പരാതിയിലാണ് അറസ്റ്റ്.
പീഡന ശ്രമത്തിനിടെ പെണ്‍കുട്ടി വീട്ടില്‍ നിന്ന് ഇറങ്ങി ഓടി രക്ഷപ്പെടുകയായിരുന്നു. തുടര്‍ന്ന് വിവരം പെണ്‍കുട്ടി വീട്ടുകാരെ അറിയിച്ചു. പെണ്‍കുട്ടിയുടെ പിതാവ് നേമം പൊലിസില്‍ നല്‍കിയ പരാതിയുടെ അടിസ്ഥാനത്തിലാണ് പ്രതിയെ പൊലിസ് പിടികൂടിയത്. സംഭവ സമയം പ്രതി മദ്യ ലഹരിയിലായിരുന്നതായി പൊലിസ് പറഞ്ഞു. എന്നാല്‍ സംഭവം പുറത്തറിഞ്ഞാല്‍ കുട്ടിയുടെ ഭാവിയെ ബാധിക്കുമെന്ന് പറഞ്ഞ് പ്രതിയെ രക്ഷിക്കാന്‍ പ്രദേശിക പ്രവര്‍ത്തകര്‍ പൊലിസിനെ സ്വാധീനിക്കാന്‍ ശ്രമം നടത്തിയിരുന്നതായും നാട്ടുകാര്‍ക്കിടയില്‍ ആക്ഷേപമുയര്‍ന്നിരുന്നു.
ഇതിന് തെളിവാണ് സംഭവം നടന്ന് രണ്ട് ദിവസം കഴിഞ്ഞിട്ടും പ്രതിയെ പിടികൂടാന്‍ പൊലിസ് തയാറാകാതിരുന്നതെന്നും നാട്ടുകാര്‍ പറയുന്നു. ബന്ധുക്കള്‍ ചൈല്‍ഡ് ലൈന്‍ പ്രവര്‍ത്തകരുമായി ബന്ധപ്പെട്ടതിനെ തുടര്‍ന്നാണ് വിഷയം പുറത്തറിഞ്ഞതും പൊലിസ് കേസ് രജിസ്റ്റര്‍ ചെയ്ത് പ്രതിയെ കസ്റ്റഡിയിലെടുത്തതെന്നും അവര്‍ പറഞ്ഞു.