കാളികാവ്: കര്‍ണാടകയില്‍ നിന്ന് ഏപ്രില്‍ 25 ന് ആയുധങ്ങളുമായി പുറപ്പെട്ട മാവോവാദി സംഘം അട്ടപ്പാടി അഗളിയിലെത്തിയതായി സൂചന. ആയുധങ്ങള്‍ പല ഭാഗങ്ങളാക്കി വേര്‍തിരിച്ചാണ് ഇവര്‍ എത്തിച്ചതെന്നാണ് വിവരം. സൈലന്റ്‌വാലി മേഖലയിലേക്കാണ് ആയുധം കടത്തിയിരുന്നത്. കേരളത്തിലും തമിഴ്‌നാട്ടിലും ഒരു പോലെ ആയുധം ഉപയോഗിക്കാനുള്ള സാധ്യത മുന്‍നിര്‍ത്തിയാണ് സൈലന്റ് വാലിയിലേക്ക് ആയുധം എത്തിച്ചതെന്നാണ് കരുതുന്നത്.
കേരളം, കര്‍ണാടക, തമിഴ്‌നാട് സംസ്ഥാനങ്ങള്‍ ഉള്‍പ്പെടുന്ന പശ്ചിമഘട്ട മേഖലാ കമ്മിറ്റി ശക്തിപ്പെടുത്താനാണ് മാവോവാദികളുടെ നീക്കം. രണ്ട് വര്‍ഷത്തിനുള്ളില്‍ പശ്ചിമഘട്ട മേഖലാ കമ്മിറ്റിക്ക് കനത്ത തിരിച്ചടിയാണ് നേരിട്ടിട്ടുള്ളത്. കേന്ദ്ര കമ്മിറ്റി അംഗമായ കുപ്പുദേവരാജ് ഉള്‍പ്പടെയുള്ള രണ്ട് പേരുടെ മരണം, വനിതകളില്‍ പ്രധാനിയായ കന്യാകുമാരി ഉള്‍പ്പടെയുള്ളവരുടെ കീഴടങ്ങല്‍, കാളിദാസ് പിടിയിലായതുള്‍പ്പടെയുള്ളവയാണ് മാവോവാദികള്‍ക്ക് കനത്ത തിരിച്ചടിയായിട്ടുള്ളത്.
ആയുധങ്ങളുടെ കുറവാണ് പശ്ചിമഘട്ട മേഖലാ കമ്മിറ്റിയുടെ പ്രവര്‍ത്തനങ്ങളില്‍ വലിയ പോരായ്മയായി ചൂണ്ടിക്കാണിക്കപ്പെടുന്നത്. പോരായ്മ പരിഹരിക്കുക എന്ന ലക്ഷ്യത്തോടെയാണ് സൈലന്റ്‌വാലി മേഖലയിലേക്കുള്ള ആയുധക്കടത്ത്.
കേരളത്തില്‍ മാവോവാദികളുടെ സായുധ സേനാധിപ ചുമതല വഹിക്കുന്ന വിക്രം ഗൗഡയാണ് ആയുധക്കടത്തിന് നേതൃത്വം നല്‍കുന്നത്. മാവോവാദി നിരയില്‍ ആയുധ നിര്‍മാണത്തിലും ഉപയോഗത്തിലും മുന്‍പന്തിയില്‍ നില്‍ക്കുന്ന ആളുകൂടിയാണ് വിക്രം ഗൗഡ. ആയുധക്കടത്തിന്റെ പശ്ചാത്തലത്തില്‍ നിര്‍ജീവമായി കിടന്നിരുന്ന ദളങ്ങള്‍ പ്രവര്‍ത്തന സജ്ജമായതായും സൂചനയുണ്ട്. സി.പി.മൊയ്തീന്റെ നേതൃത്വത്തിലുള്ള സംഘത്തെ ബുധനാഴ്ച താമരശ്ശേരി പൊലിസ് സ്റ്റേഷന്‍ പരിധിയില്‍ കണ്ടിരുന്നു. മൊബൈല്‍ ഫോണുകളും ടാബ്‌ലറ്റുകളും റീച്ചാര്‍ജ് ചെയ്തും ഭക്ഷണമുണ്ടാക്കി കഴിച്ചും രണ്ട് മണിക്കൂര്‍ ചിലവഴിച്ചതിന് ശേഷമാണ് സംഘം കാട്ടിലേക്ക് മടങ്ങിയത്. ആയുധം കടത്തുന്ന സംഘത്തില്‍ നിന്ന് പൊലിസിന്റെ ശ്രദ്ധ തിരിക്കാനാണ് സി.പി മൊയ്തീനും സോമനും ഉള്‍പ്പെടെയുള്ളവര്‍ ശ്രമിച്ചതെന്നാണ് കരുതുന്നത്. രണ്ട് ദിവസം മുന്‍പ് അഗളിയില്‍ മാവോവാദി സാന്നിധ്യം റിപ്പോര്‍ട്ട് ചെയ്തിരുന്നു. അഗളിയില്‍ കണ്ട സംഘം സൈലന്റ്‌വാലി മേഖലയിലേക്ക് ആയുധവുമായി എത്തിയവരായിരിക്കാമെന്നാണ് കരുതുന്നത്.