വടകര: റെയില്‍വേ സ്റ്റേഷനു സമീപം അക്കേഷ്യ മരങ്ങളുള്ള കാട്ടില്‍ പുലിയുണ്ടെന്നു പ്രചാരണം. ഞായറാഴ്ച രാത്രി മുതല്‍ പൊലിസ് സ്‌റ്റേഷനില്‍ വിളി എത്തിയതോടെ നിജസ്ഥിതി അറിയാന്‍ എ.എസ്.ഐ രാമകൃഷ്ണനും സംഘവും റെയില്‍വേ സ്‌റ്റേഷന്‍ പരിസരത്ത് തിരച്ചില്‍ നടത്തിയെങ്കിലും ഒന്നും കണ്ടെത്താനായില്ല.
സമീപത്തെ അക്കേഷ്യ മരത്തിനിടയില്‍ പുലിയുണ്ടെന്ന മട്ടിലാണ് പ്രചാരണം വന്നത്. ട്രെയിന്‍ ഇറങ്ങി വരുന്നവര്‍ക്കും റെയില്‍വേ സ്റ്റേഷനില്‍ എത്തുന്നവര്‍ക്കും പൊലിസ് ജാഗ്രതാ നിര്‍ദേശം നല്‍കിയെന്ന രീതിയില്‍ വാട്ട്‌സ്ആപ്പിലും മറ്റും പ്രചാരണം വന്നതോടെ ആളുകള്‍ ആശങ്കയിലായി. ഇങ്ങനെയൊരു നടപടിയുണ്ടായിട്ടില്ലെന്നു പൊലിസ് വ്യക്തമാക്കി. പലരും വിളിച്ച് ചോദിച്ചതിന്റെ അടിസ്ഥാനത്തില്‍ പോയി നോക്കുകയല്ലാതെ മറ്റൊന്നും ഉണ്ടായിട്ടില്ലെന്നും ഇക്കാര്യത്തില്‍ ആധികാരികമായ ഒരു സൂചനയും ലഭിച്ചിട്ടില്ലെന്നും പൊലിസ് അറിയിച്ചു.
കഴിഞ്ഞ ദിവസം കണ്ണൂരില്‍ വീണ്ടും പുലി പ്രത്യക്ഷപ്പെട്ടെന്നു വാര്‍ത്ത പരന്നിരുന്നു. വടകരയില്‍ തന്നെ അഴിത്തല റോഡില്‍ ഒരു വീടിന്റെ ടെറസില്‍ പുലിയുടെ കളിപ്പാട്ടംവച്ച് ഫോട്ടോ എടുത്ത് വീട്ടിനു മുകളില്‍ പുലിയുണ്ടെന്ന മട്ടില്‍ വാട്ട്‌സ്ആപ്പില്‍ പ്രചാരണം നടത്തിയിരുന്നു.