സ്വന്തം ലേഖകന്‍

ചേവായൂര്‍: പനി ബാധിച്ച് മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്ന പേരാമ്പ്ര സ്വദേശിയായ യുവാവിന്റെ മരണം അണുബാധ മൂലമെന്ന് പോസ്റ്റ്‌മോര്‍ട്ടം റിപ്പോര്‍ട്ട്. സിവില്‍ എന്‍ജിനീയറായ പേരാമ്പ്ര ചങ്ങരോത്ത് വളച്ചുകെട്ടിയില്‍ സ്വാലിഹ് (26) ആണ് കടുത്ത പനിയെ തുടര്‍ന്ന് കഴിഞ്ഞ ദിവസം മെഡിക്കല്‍ കോളജ് ആശുപത്രയില്‍ മരിച്ചത്.
മെയ് 13ന് കുറ്റ്യാടി താലൂക്ക് ആശുപത്രിയില്‍ പ്രവേശിപ്പിച്ച യുവാവിനെ മെഡിക്കല്‍ കോളജ് ആശുപത്രിയിലേക്കു മാറ്റുകയായിരുന്നു.
മരണ കാരണം വ്യക്തമാകാത്തതിനെ തുടര്‍ന്നാണ് ഡോക്ടര്‍മാര്‍ പോസ്റ്റ്‌മോര്‍ട്ടത്തിന് നിര്‍ദേശം നല്‍കിയത്. തുടര്‍ന്ന് അണുബാധയാണ് മരണത്തിന് കാരണമെന്ന് വ്യക്തമാവുകയായിരുന്നു. എന്നാല്‍ കുറ്റ്യാടി താലൂക്ക് ആശുപത്രിയില്‍ നിന്നാണോ, മെഡിക്കല്‍ കോളജ് ആശുപത്രിയില്‍ നിന്നാണോ അണുബാധയേറ്റതെന്ന് സ്ഥിരീകരിച്ചിട്ടില്ല. അതേസമയം ചികിത്സയ്ക്കിടെ രണ്ട് ആശുപത്രികളില്‍ നിന്നും രോഗിക്കു വേണ്ട രീതിയിലുള്ള പരിരക്ഷ ലഭിച്ചില്ലെന്ന ആരോപണം ശക്തമാണ്. അണുബാധ ഏല്‍ക്കാത്തവിധം ഐ.സി.യുവിലേക്കു മാറ്റുകയോ അടിയന്തര ചികിത്സ ലഭിക്കുകയോ ചെയ്തില്ലെന്നാണ് പരാതി. മൃതദേഹത്തില്‍ അണുബാധ കണ്ടെത്തിയതിനെ തുടര്‍ന്ന് ഭയം കാരണം മോര്‍ച്ചറിയിലെ പോസ്റ്റുമോര്‍ട്ടം നടത്തുന്ന മുറി ഇന്നലെ രാവിലെ അടച്ചത് പ്രവര്‍ത്തനം അനിശ്ചിതത്വത്തിലാക്കി.
അണുവിമുക്തമാക്കാതെ തുടര്‍ന്നുള്ള പോസ്റ്റുമോര്‍ട്ടങ്ങള്‍ നടത്താനാകില്ലെന്ന് ഡോക്ടര്‍മാര്‍ പറഞ്ഞതോടെയാണ് പോസ്റ്റ്‌മോര്‍ട്ടം നടത്തുന്ന മുറി പൂട്ടിയത്. ഇതേ തുടര്‍ന്ന് ഡോ. കൃഷ്ണകുമാറിന്റെ നിര്‍ദേശപ്രകാരം ഇന്‍ക്വസ്റ്റ് മുറിയില്‍ വച്ച് ഇന്നലെ ഏഴോളം പോസ്റ്റ്‌മോര്‍ട്ടങ്ങള്‍ നടത്തി. സംഭവത്തില്‍ ഡി.എം.ഒ മെഡിക്കല്‍ കോളജിലെ ഡോക്ടര്‍മാരെ ഉള്‍പ്പെടുത്തി അടിയന്തര യോഗം വിളിച്ചു. പ്രത്യേക സംഘമെത്തി മോര്‍ച്ചറി ഇന്ന് അണുവിമുക്തമാക്കിയേക്കും.