കൊണ്ടോട്ടി: ഡിഫ്തീരിയ ബാധിച്ചു വിദ്യാര്‍ഥി മരിച്ചതിനെത്തുടര്‍ന്നു പുളിക്കല്‍ എ.എം.എം. ഹൈസ്‌കൂളിലെ 943 വിദ്യാര്‍ഥികള്‍ക്ക് ആരോഗ്യ വകുപ്പു പ്രതിരോധ കുത്തിവെപ്പു നല്‍കി. ശേഷിക്കുന്ന വിദ്യാര്‍ഥികള്‍ക്ക് ഇന്നു കുത്തിവെപ്പു നല്‍കും.ഇതുവരെ കുത്തിവെപ്പെടുക്കാത്തവര്‍ക്കും ഭാഗികമായി എടുത്തവര്‍ക്കും ടി.ഡി. കുത്തിവെപ്പെടുത്തു. ഇതുവരെ എടുക്കാത്ത കുട്ടികള്‍ക്കു മൂന്ന് തവണയും നേരത്തെ എടുത്തു മുഴുവാനാക്കത്തവര്‍ക്ക് ഒരുതവണയുമാണു കുത്തിവെപ്പു നല്‍കാന്‍ തീരുമാനിച്ചത്. ഇതില്‍ ആദ്യഘട്ടമാണ് ഇന്നലെ ആരംഭിച്ചത്.യു.പി.ഹൈസ്‌കൂള്‍ വിഭാഗത്തിലെ മുഴുവന്‍ വിദ്യാര്‍ഥികളേയും കുത്തിവെപ്പിനു വിധേയമാക്കുന്നുണ്ട്. ശനിയാഴ്ച സ്‌കൂളിലെ വിദ്യാര്‍ഥികളുടെ രക്ഷിതാക്കള്‍ക്ക് ആരോഗ്യവകുപ്പ് ബോധ വല്‍കരണം നടത്തിയിരുന്നു.തുടര്‍ന്നാണ് രക്ഷിതാക്കള്‍ മക്കളെ കുത്തിവെപ്പിന് വിധേയമാക്കാന്‍ സന്നദ്ധത അറിയിച്ചത്.