പൂച്ചാക്കല്‍: അരൂക്കുറ്റിയില്‍ കെ.എസ്.ആര്‍.ടി.സി ബസിന്റെ ചില്ലുകള്‍ തകര്‍ത്ത പ്രതി പൊലിസ് പിടിയില്‍. അരൂക്കുറ്റി പഞ്ചായത്ത് പന്ത്രണ്ടാം വാര്‍ഡ് രാഗവിഹാറില്‍ അനുരാഗ് (24)ആണ് പിടിയിലായത്.
കഴിഞ്ഞ ദിവസം പൊലിസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലാണ് എസ്.ഐ ജേക്കബ് റജി ജോസഫും സംഘവും പ്രതിയെ പിടികൂടിയത്. ഈ മാസം എട്ടാം തീയതി രാത്രി അരൂക്കുറ്റി പഴയ ബാസ്റ്റാന്റില്‍ പാര്‍ക്ക് ചെയ്തിരുന്ന ബസിന്റെ ചില്ലാണ് തകര്‍ത്തത്. ചേര്‍ത്തല ഡിപ്പോയില്‍ നിന്ന് രാത്രി അവസാനമായി അരൂക്കുറ്റിയിലേക്കും പുലര്‍ച്ചേ ആദ്യം അരൂക്കുറ്റിയില്‍ നിന്നും ചേര്‍ത്തലയിലേക്കും സര്‍വ്വീസ് നടത്തുന്ന ബസ് രാത്രി അരൂക്കുറ്റിയിലാണ് സ്റ്റേ ചെയ്യുന്നത്.
ജീവനക്കാര്‍ താമസിച്ചിരുന്ന മുറി പുറത്തുനിന്ന് പൂട്ടിയശേഷമാണ് പ്രതി ബസിന്റെ ചില്ല് കല്ല് കൊണ്ട് ഇടിച്ചു തകര്‍ത്തത്.  ബസ് നിര്‍ത്തിയിട്ടിരുന്ന സ്ഥലത്ത് സ്ഥിരമായി കാണാറുള്ളവരെയും വ്യാപാരസ്ഥാപനങ്ങളിലെയും വീടുകളിലെയും സി.സി ടി.വി ദൃശ്യങ്ങള്‍ തുടങ്ങിയവയുമായി ബന്ധപ്പെടുത്തിയായിരുന്നു അന്വേഷണം. പ്രതിയെ കോടതിയില്‍ ഹാജരാക്കി റിമാന്റ് ചെയ്തു.