ഇരിങ്ങാലക്കുട: എഴുത്തുകാരന് സമൂഹത്തില്‍ മാറ്റം സൃഷ്ടിക്കാന്‍ സാധിക്കുമെന്നു എഴുത്തുകാരനും അധ്യാപകനുമായ പി.കെ ഭരതന്‍ മാസ്റ്റര്‍ പറഞ്ഞു.
ഇരിങ്ങാലക്കുട ആസ്ഥാനമായി പ്രവര്‍ത്തിക്കുന്ന എഴുത്തുകാരുടെ കൂട്ടായ്മയായ സംഗമസാഹിതി പുറത്തിറക്കുന്ന ഇരിങ്ങാലക്കുടയിലെ 34 കവികളുടെ കവിതകള്‍ ഉള്‍കൊള്ളുന്ന സമാഹാരം 'കവിതാസംഗമം' പ്രകാശന യോഗം ഇരിങ്ങാലക്കുടയില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.സംഗമ സാഹിതി പോലെയുള്ള കൂട്ടായ്മകള്‍ എഴുത്തുകാരുടെ വളര്‍ച്ചയ്ക്കു വഴിയൊരുക്കുമെന്നും ഭരതന്‍ മാസ്റ്റര്‍ പറഞ്ഞു. 'കവിതാസംഗമം' പ്രശസ്ത കവി സെബാസ്റ്റ്യന്‍, പ്രൊഫ. സാവിത്രി ലക്ഷ്മണനു നല്‍കി പ്രകാശനം ചെയ്തു.
മുകുന്ദപുരം താലൂക്ക് ലൈബ്രറി കൗണ്‍സില്‍ സെക്രട്ടറി ഖാദര്‍ പട്ടേപ്പാടം അധ്യക്ഷനായി. രാജേഷ് തെക്കിനിയത്ത്, കെ.ഹരി, എം.ആര്‍ സനോജ്, ജോജി ചന്ദ്രശേഖരന്‍, റഷീദ് കാറളം, രാജേഷ് തംബുരു സംസാരിച്ചു.