പേരാമ്പ്ര: പാലേരിയില്‍ കഴിഞ്ഞ ദിവസങ്ങളിലുണ്ടായ അനിഷ്ട സംഭവങ്ങളില്‍ പ്രദേശത്തു സമാധാനാന്തരീക്ഷം പുനഃസ്ഥാപിക്കാന്‍ പഞ്ചായത്ത് പ്രസിഡന്റ് വിളിച്ചുചേര്‍ത്ത സര്‍വകക്ഷി യോഗത്തില്‍ നിന്നു സി.പി.എം വിട്ടുനിന്നു. യോഗത്തില്‍ എത്തിച്ചേരുമെന്നറിയിച്ച ഡിവൈ.എസ്.പിയും സബ് ഇന്‍സ്‌പെക്ടറും പങ്കെടുക്കാത്തതില്‍ യോഗം ഐകകണ്‌ഠ്യേന പ്രതിഷേധിച്ചു. അനിഷ്ട സംഭവങ്ങളെ അപലപിച്ച യോഗം സമാധാന അന്തരീക്ഷം പുനഃസ്ഥാപിക്കാനുള്ള അടിയന്തിര നടപടികള്‍ സ്വീകരിക്കണമെന്ന് പൊലിസിനോട് ആവശ്യപ്പെട്ടു. പഞ്ചായത്ത് പ്രസിഡന്റ് കെ.കെ ആയിഷ അധ്യക്ഷയായി. എന്‍.പി വിജയന്‍, അനേരി നസീര്‍, കെ.സി രാധാകൃഷ്ണന്‍, കെ.കെ ഭാസ്‌ക്കരന്‍, കെ.ജി രാമനാരായണന്‍, ഒ.ടി ബഷീര്‍, ഇ.ടി സരീഷ്, പ്രകാശന്‍ കന്നാട്ടി, പാളയാട്ട് ബഷീര്‍, ഇ.സി രാമചന്ദ്രന്‍, ശ്രീനാഥ് പലേരി, ഇല്ലത്ത് മോഹനന്‍ പ്രസംഗിച്ചു.