വാഷിങ്ടണ്‍: ഇന്ത്യയും ചൈനയും ഉള്‍പ്പെടെ 23 രാജ്യക്കാര്‍ക്ക് അമേരിക്കയിലേക്കു വിസ നല്‍കരുതെന്ന് യു.എസ് സെനറ്റംഗം. സെനറ്റിലെ മുതിര്‍ന്ന അംഗവും റിപ്പബ്ലിക്കന്‍ പാര്‍ട്ടിക്കാരനായ ചെക് ഗ്രാസ്‌ലെയാണ് അമേരിക്കന്‍ പ്രസിഡന്റ് ബരാക് ഒബാമയോടും ഭരണകൂടത്തോടും ഇക്കാര്യം ആവശ്യപ്പെട്ടത്. 

അമേരിക്കയിലെ അനധികൃത കുടിയേറ്റക്കാരെ തിരികെ കൊണ്ടുപോകാന്‍ ഈ രാജ്യങ്ങള്‍ സഹകരിക്കുന്നില്ലെന്നു ചൂണ്ടിക്കാട്ടിയാണ് ചെക് ഗ്രാസ്‌ലെ ഇക്കാര്യം ഉന്നയിക്കുന്നത്. ഇന്ത്യയ്ക്കു പുറമേ ചൈന, ക്യൂബ, സൊമാലിയ, ഘാന തുടങ്ങി 23 രാജ്യങ്ങളില്‍ നിന്നുള്ളവര്‍ക്ക് അമേരിക്കയിലേക്കു കുടിയേറ്റമോ അല്ലാത്തവയോ ആയ വിസ അനുവദിക്കരുതെന്നാണ് ഇദ്ദേഹത്തിന്റെ ആവശ്യം. ഈ രാജ്യങ്ങളില്‍നിന്നുള്ള കൊലപാതകികളടക്കമുള്ള ക്രിമിനലുകള്‍ അമേരിക്കയില്‍ വിലസുകയാണെന്നും ഇവരെ തിരികെ കൊണ്ടുപോകാന്‍ ആ രാജ്യങ്ങള്‍ തയാറാകുന്നില്ലെന്നും ആരോപിച്ച ചെക് ഗ്രാസ്‌ലെ, അത്തരം രാജ്യക്കാര്‍ക്ക് ഇനി വിസ അനുവദിക്കരുതെന്നാവശ്യപ്പെട്ട് അമേരിക്കന്‍ സുരക്ഷാവിഭാഗം സെക്രട്ടറി ജെ ജോണ്‍സണ് കത്തയക്കുകയും ചെയ്തു.