റിയാദ്: യമനില്‍ വിമത വിഭാഗമായ ഹൂതികള്‍ നടത്തിയ മിസൈല്‍ ആക്രമണത്തില്‍ അഞ്ചു പേര്‍ മരിക്കുകയും 22 പേര്‍ക്ക് പരുക്കേല്‍ക്കുകയും ചെയ്തു. മആരിബ് പട്ടണം കേന്ദ്രീകരിച്ചാണ് ആക്രമണം നടന്നത്. ഇവിടെ നഗരത്തിനു മധ്യത്തിലുള്ള തിരക്കുള്ള മാര്‍ക്കറ്റ് കേന്ദ്രമാക്കിയാണ് ഹൂതികള്‍ കത്യുഷ മിസൈലുകള്‍ വിക്ഷേപിച്ചതെന്നു സബാ വാര്‍ത്താ ചാനല്‍ റിപ്പോര്‍ട്ട് ചെയ്തു. അതേസമയം, കഴിഞ്ഞയാഴ്ച്ച ഹുദൈദ തുറമുഖത്ത് സമീപം തുര്‍ക്കി കപ്പലിനുണ്ടായ തീപിടുത്തത്തിന് കാരണം ഹൂതികള്‍ നടത്തിയ ആക്രമണമായിരുന്നെന്നു യമനില്‍ യുദ്ധത്തിലേര്‍പ്പെട്ട അറബ് സഖ്യ സേന വക്താവ് കേണല്‍ തുര്‍ക്കി അല്‍ മാലികി പറഞ്ഞു.

റഷ്യയില്‍ നിന്നുള്ള ഗോതമ്പ് കയറ്റിവന്ന കപ്പലിന് നേരെയാണ് ആക്രമണമുണ്ടായത്. കപ്പലിന് സഖ്യസേന സഹായം നല്‍കിയതായും അദ്ദേഹം പറഞ്ഞു. കപ്പലിന് സമീപം ഒരു ബോട്ട് എത്തുകയും ഉടന്‍ തന്നെ കപ്പലിന് നേരെ ആക്രമണം ആരംഭിക്കുകയായിരുന്നുവെന്നും അദ്ദേഹം പറഞ്ഞു. ആക്രമണം തുടരുന്ന സാഹചര്യത്തില്‍ ബാബു അല്‍ മന്‍ദബ് കടലിടുക്കിലൂടെയും ചെങ്കടലിലൂടെയും കടന്നു പോകുന്ന മുഴുവന്‍ കപ്പലുകള്‍ക്കും സുരക്ഷ ശക്തമാക്കിയതായി അദ്ദേഹം പറഞ്ഞു.

അതേസമയം, ഇറാന്‍ സഹായത്തോടെ അന്ത്രാഷ്!ട്ര കടലിടുക്കില്‍ ആക്രമണത്തിന് കോപ്പു കൂട്ടുകയായിരുന്ന രണ്ടു ബോട്ടുകള്‍ സഖ്യ സേന തകര്‍ത്തു. ബുധനാഴ്ച്ച രാവിലെയാണ് ഇറാന്‍ സഹായ ഹൂതി ബോട്ടുകള്‍ സഖ്യ സേന തകര്‍ത്തത്. ചെങ്കടലില്‍ അന്ത്രാഷ്!ട്ര കപ്പല്‍ പാതയില്‍ സഞ്ചരിക്കുകയായിരുന്ന എണ്ണക്കപ്പലിനു നേരെ ആക്രമണം നടത്തുന്നതിടെയാണ് സഖ്യ സേന ബോട്ടുകള്‍ തകര്‍ത്തത്. രണ്ടു ബോട്ടുകള്‍ രക്ഷപ്പെടുകയും ചെയ്തിട്ടുണ്ട്. അന്ത്രാരാഷ്!ട്ര കപ്പല്‍ പാതയില്‍ സഖ്യ സേനയുടെ നിരന്തര നിരീക്ഷണമുണ്ടെകിലും ഹൂതികളുടെ സാമീപ്യം ഭീഷണിയുയര്‍ത്തുകയാണ്.