കൊണ്ടോട്ടി: മലപ്പുറം ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥി പി.കെ കുഞ്ഞാലിക്കുട്ടി അനുഗ്രഹം തേടി സമസ്ത പ്രസിഡന്റ് സയ്യിദ് ജിഫ്‌രി മുത്തുക്കോയതങ്ങളെ സന്ദര്‍ശിച്ചു. ഇന്നലെ ഉച്ചക്ക് കൊണ്ടോട്ടി ഖാസിയാരകം ജുമുഅത്ത് പള്ളിയില്‍ ജുമുഅ നിസ്‌ക്കാരശേഷം മുണ്ടക്കുളം ശംസുല്‍ ഉലമ കോംപ്ലക്‌സില്‍ എത്തിയാണ് അദ്ദേഹം ജിഫ്‌രി തങ്ങളെ കണ്ടത്, തങ്ങളുമായി അദ്ദേഹം കൂടിക്കാഴ്ച നടത്തി.
മതേതരത്വമാണ് രാജ്യത്തിനാവശ്യമെന്നും ഇന്ത്യയിലെ പിന്നോക്ക, മതന്യൂനപക്ഷ സൗഹാര്‍ദ്ദമുണ്ടാക്കാന്‍ ഇറങ്ങുന്നവര്‍ വിജയിക്കണമെന്നും സയ്യിദ് ജിഫ്‌രി മുത്തുക്കോയതങ്ങള്‍ പിന്നീട് മാധ്യമപ്രവര്‍ത്തകരോട് പറഞ്ഞു. ജനങ്ങള്‍ക്ക് വേണ്ടി, സമുദായ സൗഹാര്‍ദ്ദങ്ങള്‍ക്ക് വേണ്ടി പ്രവര്‍ത്തിക്കുന്നവര്‍ക്ക് വോട്ടുചെയ്യുകയെന്നത് സമസ്തയുടെ എക്കാലത്തേയും നിലപാടാണ്, തങ്ങള്‍ പറഞ്ഞു.
തെരഞ്ഞടുപ്പില്‍ ഏറെ അനുകൂലമായ സാഹചര്യമാണുള്ളതെന്ന് കുഞ്ഞാലിക്കുട്ടി പിന്നീട് പറഞ്ഞു. മുന്നണികളും മതേതരത്വത്തില്‍ വിശ്വസിക്കുന്നവരും കൂടെയുണ്ടെന്ന വിശ്വാസമുണ്ടെന്നും അദ്ദേഹം പറഞ്ഞു.